بلوچ سرڈگار شہ نفرت و فرقگزاریا پلگار بیت اِنت: نشنل پارٹی



 طاھر بزنجو و دگہ گوں مسلم ٹاؤن دیوانا تران کنگا اَنت۔ توار فوٹو



بلوچستانءِ مزنتریں سیاسی و ایوکیں لبرال گل ‘نشنل پارٹی‘ءِ کارگشادءَ گشت کہ بلوچاں توشے زھر ھم نہ یئت اگر پنجابءَ طلاءِ کشار بہ رودیت و بینگ و شیرءِ کئور بہ تچ اَنت۔ ھمے وڑا بلوچ مڈی و تیابدپءِ نیمگا شانْک دیگ بیتگیں بد نیتیں چم اوپار کنگ بہ بی اَنت۔ واجہ طاھر بزنجوءَ اے گپ کوئٹہءِ مسلم ٹاؤنءَ برجم داشتگیں دیوانےءِ دیما درشان کت اَنت۔ گوں دیوانا نواب محمد شاھوانی، کمال خان بنگلزئی، داکٹر اسحاق بلوچ، شکیل بلوچ، خیربخش بلوچ، نیاز بلوچ، اسلم بلوچ، علی احمد لانگو، اقبال زھری و دگہ کساں ھم تران کت۔

طاھر بزنجوءَ دیوان سرپد کت کہ نشنل پارٹی جھدا اِنت کہ بلوچستان شہ نفرت و فرقگزاریا پلگار بہ بیت و ادا نندوکیں سرجمیں مردم ملکءِ سیت و تاوان، غم و شادِھیا بروبر شریدار بہ بی اَنت۔ اگر کسے بہ گشیت کہ منا گوں بلوچستانءَ کار نیست، گڈا آیی بلوچستانءِ دوستواہ نہ اِنت۔ ادا نندوکیں ھر مردمءِ ذمواری اِنت کہ بلوچستانءِ سرا بیوکیں زوراکی و نا انصافیءِ خلافا جھد بہ کنت۔

بلوچستانءِ حقاں جَنوکیں بالادست واکاں ڈوباراں طاھر بزنجوءَ گشت ”شہ گوستگیں 64 سالاں ملکءِ واکدار و چیریں دستاں بلوچستانءِ مڈیانی سرا بلوچءِ واھندیءِ حقا منّگءِ بدلا یکّویی زوراکی کتگ و ایشیءِ سببا بلوچانی دلا زبھریءِ مارشتاں ریشگ جتگ۔ اگر بلوچستانءِ مڈی و تیابءِ واھند بلوچانی بیگءِ راستی واکداراں بہ منّتین اَت، گڈا ملک مرچی جیڑوانی آماچ نہ بیتگ اَت۔“

گوں دیوانا تران کناں محمد خان شاھوانیءَ سرکار کچّہ چت و جست کت ” دوز، ڈوک و پلچانچ کنوک پہ استمانءِ حقانی پچگرگا یکجاہ بیت کن اَنت، پرچا استمان پہ اے کموکیں دشمنانی دارگا یکجاہ بیت نہ کنت؟“ واجہ کمالخان بنگلزئیءَ گیش کت: استمانءَ نشنل پارٹیءِ پلاٹفارمءِ سرا یکجاہ بیگی اِنت۔ پرچاکہ نشنل پارٹی پہ سرڈگار، راجی پجّار، مڈی، تیاب و حاکمیءِ حقءِ رکّینگا جھد کنگا اِنت۔“ آنلائن