انسانی حقانی پادمالی ې خلافا نشنل پارٹی ئا میڑی کۏت

تربتءَ نشنل پارٹیءِ جھدکارے کشگ بوت

بلوچ سرڈگار شہ نفرت و فرقگزاریا پلگار بیت اِنت: نشنل پارٹی



 طاھر بزنجو و دگہ گوں مسلم ٹاؤن دیوانا تران کنگا اَنت۔ توار فوٹو



بلوچستانءِ مزنتریں سیاسی و ایوکیں لبرال گل ‘نشنل پارٹی‘ءِ کارگشادءَ گشت کہ بلوچاں توشے زھر ھم نہ یئت اگر پنجابءَ طلاءِ کشار بہ رودیت و بینگ و شیرءِ کئور بہ تچ اَنت۔ ھمے وڑا بلوچ مڈی و تیابدپءِ نیمگا شانْک دیگ بیتگیں بد نیتیں چم اوپار کنگ بہ بی اَنت۔ واجہ طاھر بزنجوءَ اے گپ کوئٹہءِ مسلم ٹاؤنءَ برجم داشتگیں دیوانےءِ دیما درشان کت اَنت۔ گوں دیوانا نواب محمد شاھوانی، کمال خان بنگلزئی، داکٹر اسحاق بلوچ، شکیل بلوچ، خیربخش بلوچ، نیاز بلوچ، اسلم بلوچ، علی احمد لانگو، اقبال زھری و دگہ کساں ھم تران کت۔

بلوچستان بلوچانی ڈیہ اِنت و ایشیءِ سرا راج کنگ بلوچانی قدرتی حق اِنت: طاھر بزنجو

نشنل پارٹی نظریاتی جھدکارانی عظیم گلے اِنت: رحمت علی بلوچ

نشنل پارٹیءَ تاجر اسرار کھوسہ و پجارءَ ناکو خیربخشءِ آوار جنگ ایر جت

ماں ڈیرہ اللہ یار ھَندی تاجر اسرار احمد کھوسہءَ آوار جنگءِ کارکرد نشنل پارٹیءِ چیردستیں صدر انجنیر حمید بلوچءَ ایر جت۔ حمید بلوچءَ قانونا رواج دیوکیں بنجاہ ایر جت اَنت و گشت کہ پہ ملام پچگرگا مردمانی آوار جَنَگ کاربارےءِ ڈولا رواج گپتگ۔ اے کاربارءِ سرکشی کنوک پولیس، لیویز و فرنٹیر کورءِ مردم اَنت۔

کراچیءِ بلوچانی پدمنتگیءِ ذموار پیپلز پارٹی اِنت: نشنل پارٹی

انجنیر حمید بلوچ

نشنل پارٹیءِ دومی چیردستیں صدر انجنیر حمید بلوچءَ ھندی آرگنائزر عبدالرؤف بلوچ و بنجاھی کونسلر حنیف بلوچءِ ھمراھیا کراچیءِ ملیر دمگا ترّتاب کت۔ اودا آواں گوں بلوچ مردماں گندار کت و آوانا گوں نشنل پارٹی ھوار بیگءِ دعوت دات۔

داکٹر عبدالمالک بلوچءَ گوں ھلری کلنٹوں وتی گدارا بلوچستانءِ جیڑہ درشان کت اَنت

 

بی ال افءِ بلوچ دوستی شہ مئے سرپدیا در اِنت: نشنل پارٹی

نشنل پارٹیءِ گوانکوا گشتگ: بنجاھی کمانڈءِ بٹاک جنوکیں بی ال افءِ آزادیءِ جھد شہ مئے سرپدیا در اِنت۔ آ سیاسی و جھموری گلاں اوپار کت نہ کن اَنت، نشنل پارٹیءِ جھدکار و کارگسانی سرا حملہ کنگا اَنت، گوادر و دگہ جاگھاں ٹلیفون جن اَنت و شہ مردماں پہ زور زر پچگر اَنت۔ ماں مند منور چکءِ عبدالقادر اش کشتگ و رندا آئیءِ لوگءِ جنیں آدم اش گوں وتی جتگیں ٹلیفوناں پریشان کتگ اَنت۔ المّا ایش ایرجنگی کارکرد اَنت۔

بی ان ام ۔خلیل ٹولیءِ سوجانی سرا بی ال اف مئے مردماں کشگا اِنت: نشنل پارٹی

نشنل پارٹیءِ گوانکوا وتی حالتاکی بیانےءَ گشتگ کہ بی ال اف پہ مردمانی گمراہ کنگا نشنل پارٹیءِ جھدکارانی سرا دروغیں میار لڈگا اِنت و گچینی جھدکاراں کشگا اِنت۔

نشنل پارٹیءِ بیانا 16 اکتوبرءَ ماں کیچ کشگ و دور دیگ بیتگیں عارف بشیر احمد وتی باسکے ظاھر کتگ و گشتگ شھیدءِ سرجمیں کٹم نشنل پارٹیءِ باسک اَنت و آئی اش نشنل پارٹیءِ باسک بیگءِ سببا کشتگ۔

پارٹیءِ گوانکوا دیمترا گشتگ کہ بی ال افءِ کارکرد نیں قومءِ دیما شرّی سرا پاشک بیتگ اَنت و قوم زانگ لوٹیت کہ پرچا ایوکا نشنل پارٹیءِ جھدکاراں آ جنگا اَنت!

”آزادیءِ ناما بی ال اف سلّیں جرم کنگا اِنت۔ پمیشا بی ال افءَ قومی آزادیءِ بھرے منّگ گوں قومءِ گناھگار بیگا ھمدپ اِنت“ بیانا گشتگ۔

نشنل پارٹیءِ گوانکوا دیمترا تبصرہ کتگ: مشترکہ کمانڈءِ جتگیں بی ال افءِ خبر بٹاکے اِنت۔ آواں ھچ کمانڈ نیست اِنت۔ اصلا بی ال افءِ کتگیں کارانی پشتا بی ان ام خلیل ٹولی اِنت۔ پرچاکہ مکرانءِ ھواریا ھر جاگہ نشنل پارٹی آئیءِ دیما اوشتاتگ۔

گڈسرا اے راستی پدّر کنگ بیتگ کہ بی ال اف یک ھنچیں پارٹیےءِ مقصداں پیلو کنگا اِنت کہ فوجی آپریش، کشگ و دور دیگ بیتگیں جسد، و دگہ زوراکیاں (گوں سرکارا) سرجمیا ھوار اِنت۔

حال روچتاک توارءِ منّتا

سرتْرپّلیں سیاستا بی ان ام و بی ال اف ٹکر کتگ اَنت، نشنل پارٹیءِ سروکاں بل اگر باسکے ھم مخبرے ثابت بوت، تیراں مئے سینگا بہ جن ات: نشنل پارٹیءِ بنجاھی گوانکو

نشنل پارٹیءِ بجاھی گوانکوا گشتگ کہ گوں بیمتراپ آواں شہ راھا دیر کنگءِ پندل ساز گوں نشنل پارٹیءَ گپ بہ کن اَنت شرتر اِنت۔ سروک وتی جاگھا، اگر ھنچوناییں باسکے پلینڈ ثابت بوت، آ وتی سینگا پہ تیر ورگا پیش کن اَنت۔ نشنل پارٹیءَ سرکارءِ بھرے ظاھر کنگءِ خبراں کہ بی ال افءِ گوانکو کنگا اِنت، چٹا رد اَنت۔ راستیا نشنل پارٹی قوم جھدءِ مُھریں بھرے اِنت و قومی جھدا گوں دلیری ھمراہ اِنت۔ مزاحمتی گلءِ یک ٹولیے نشنل پارٹیءِ سروکانی سرا زھرشانی کنگا اِنت تانکہ وتی سُبک و وطن دشمنیں کاراں مانپوشیت۔

نشنل پارٹیءِ بیانا دیمترا داتگ: نشنل پارٹیءِ چار گچیںی باسک ھمے ٹولیا شھید کتگ اَنت۔ شھید کنگ بیتگیں مولابکش دشتی، داکٹر نسیم جنگیاں، حسین بلوچ و داکٹر لال بکش لایقیں قومی راھشون اتنت۔ ایشاں وتی سرجمیں زندگی پہ قومی حقانی پچگرگ و استمانءِ وشحالیءِ جھدا گوازینت۔ گوں ایشانی جنگا یک نیمگے نشنل پارٹیءَ تاوان بیتگ و دومی قوم جُنزا زنڈیں جیڑہ ودی بیتگ اَنت۔ ھما کساں کہ نشنل پارٹیءِ ھمے راھشون کشتگ اَنت، دگہ بازیں سلکاری اش ھم کتگ اَنت۔ ایشانی کرداں گوں قومی جنزا ھچ نزیکی نیست اِنت۔ وتی جند و کٹمءِ سیتا ایشاں نشنل پارٹیءِ سریں جھدکار کشتگ اَنت۔

نشنل پاڑیءِ گوانکوا آ کشتر گشتگ: ھمے سبکیانی سببا مرچی مکران دمگا تنظیم اش دو ٹکراں بھر اِنت۔ مکرانءِ پدلیں سیاسی جھدکار کہ برات کشی و دگہ بدکردیانی سببا دلپرؤش بیتگ اتنت، مرچی وتی گستائیں پجّارے جوڑ اش کتگ۔ ھمے وڑا مفتیں دستمانجنیءِ سببا شھید غلام محمدءِ جوڑ کتگیں بی ان ام ھم دو ٹکر اِنت۔ بی ان امءِ ڈڈتریں ٹولیا ھنّی کماشیں سیاسی راھدربر کامریڈ مولاداد راھشونی کنگا اِنت۔

بی ان ام ۔خلیل ٹولیءِ سبکیانی سببا مرچی ماں کراچی و کوئٹہ پہ ظاھریےءِ دیگا آ یک کسانی مچّیے ھم سرجم کت نہ کن اَنت۔ ھمیشانی چکی کاراں بلوچ رپبلکن پارٹی شہ فرنٹا درکپگا مجبور کت۔ نیں نشنل فرنٹ ھشکیں نامے پشت کپتگ۔ پہ ایشاں انگت وھد ھست اِنت۔ (بی ال اف) وتی سنگتیا گوں ھما خاصیں ٹولیا بہ سندیت و پہ وتی مثبتیں کردءِ ادا کنگا گوں قومی جھدا ھمراہ بہ بیت۔

حال روچتاک آزادیءِ منّتا

نشنل پارٹی حب ھنکینءِ صدرءِ برات پاکستانی چاریگاں شھید کت

زی، سئے شنبہءِ بیگاھا ھندی پولیسا یک جسدے شہ بلوچستانءِ شھر حبءِ میتگ ‘پاٹھڑہ‘ دستا کپت۔ اے جسد ھنچوش کہ دگہ بازیں بلوچ جوانانی جسداں ٹپ ٹور و آئیءِ سرا تیر جنگ بیتگ۔ جسد مرزا خان رندءِ ناما پجا آرگ بوت۔ مرزا خان رند نشنل پارٹی حب ھنکینءِ صدرءِ کسانسالیں برات ات کہ پاکستانی چاریگاں 5 روچ ساریا دستگیر کتگ و چیریں جاگھےءِ برتگ ات۔ آئیءِ عمر 20 سال ات و دوازدھمی کلاسا وانگ دربرگا ات۔

حال بلوچ ٹوڈےءِ منّتا

نشنل پارٹیءِ خلافا پروپگنڈا ھمنچو باز بیتگ کہ مردم اش راست لیکگا انت: داکٹر عبدالمالک

نشنل پارٹیءِ سروک داکٹر عبدالمالک بلوچءَ گشت کہ ھنوگیں جاوراں بلوچ قومءِ مزنتریں جیڑہ قومءِ عاقبتے انت۔ اے وڑیں جیڑہءِ دیما دارگا بلوچاں عقل و ھؤش کارمرز کنگی انت۔ چمانی دیما کراچی شہ دستا در کپت و نیں کوئٹہ شہ بلوچاں پچگرگ بیگا انت۔ پمیشا آیوکیں مردم شماریءَ نشنل پارٹیءِ جھدکار الکاپیا دلگوش بہ دی انت۔ اے گپ داکٹر مالکءَ جمعہءِ بیگاھا ریاض بلوچءِ شھادتءِ ھشتمی سالروچءِ درگتا برجم دارگ بیتگیں دیوانءِ دیما کت انت۔

داکٹر عبدالمالک بلوچءَ دیمترا ترس درشان کت و گشت کہ بلوچءِ غیر سنجیدگیءِ سببا بلوچستانءِ تھا قوم اقلیتے جوڑ بیت انت۔ إنگو بلوچ گوں واکداراں مڑگا انت و آنگو پٹان جھدا انت کہ بلوچاں اقلیتے جوڑ بہ کن انت۔ اگر مردم شماریءِ وھدا بلوچاں خیال گوَر نہ کت وغیرسنجیدگی برجاہ بیت، گڈا بد واھانی اے پندل سوبین بیت انت۔

آئیا نشنل پارٹیءِ باروا گشت کہ ایشیا بلوچ قومءِ نمایندہ سیاسی گلے جوڑ کنگءِ مقصدا اے وھدی نشنل پارٹی تنظیم سازیءِ دئورا گوزگا انت۔ اے پڑا ضروری انت کہ جنیں آدم ھم منظم کنگ بہ بنت۔ ھؤریا بلوچ شھزانتانی فرض انت کہ وتی قومی ذمواریا گون نشنل پارٹیءِ کشگ پلانگریا ادا بہ کن انت۔ پرچاکہ نشنل پارٹیءِ خلافا منفی پروپگنڈا ھمنچو باز بیتگ کہ نیں مردم ایشاں راست منـّگا انت۔

روچتاک انتخابءِ منـّتا

بلوچستانءِ ھر لوگ و میتگ پرسیگ إنت: نشنل پارٹی

"پاکستانی کارکردانی سببا مرچی بلوچستانءِ ھر لوگ و میتگ پرسیتگ إنت۔ ریاستی إدارہ یکـّوئی ٹپ ٹوریں جسد ماں تلپیں پڑاں دئور دیگا أنت۔ إیشی مردماں بیم دیگءِ مقصدا بیگا إنت۔ إے وڑیں حالتا أگر ما وتی ھؤش کارمرز نہ کت و ھمدست نہ بیتیں، گڈا بلوچ قومءِ نوکجوان مارا ھچبر پھل نہ کن أنت" نشنل پارٹیءِ پیسری سروک داکٹر عبدالحئیءَ گوں حالکاراں گشت۔

داکٹر عبدالحئیءَ دیمترا درّائینت " تانگہ ماں بلوچستان بیتگیں چار فوجی آپریشناں بلوچ قوم نہ جوکینتگ و ھنـّییں وھدا کہ کشتگیں نوجوانانی جسد چست کنگ بیگا أنت، سیاسی جھدکارانی حوصلہ بلندتر بیان أنت۔"

داکٹر عبدالحئیءَ شھیدانی قربانی سلام پیئش کت أنت و دیمترا درّائینت "نصیر کمالان، أحمد داد، زکریا بلوچ، محمد حسین، نثار بلوچ و دگہ صداں بلوچاں پہ آزادیا وتی جان ندر کتگ أنت۔"

نشنل پارٹیءِ ھنـّیگیں سروک داکٹر مالک بلوچءَ گوں پرائوٹ ٹلوژن چئنلےءَ گشت کہ بلوچانی خاطرا پیپلزپارٹی سرکار چاریگاں دلرنج نہ کنت۔ پمیشا سرکارءِ گارکتگیں بلوچانی رکـّینگا گامگیج نہ بیگا أنت۔

داکٹر مالکءَ دیمترا درّائینت "بلوچستانءِ مردماں مدام 'آمرانی' خلافا جھد کتگ۔ ألبت سرکاری چاریگانی کمکا زوراکیں ٹولیا مدام پارلمنٹءِ سرا قبضہ کتگ و درمیانی کلاسءِ مردم إش دیما نہ إشتگ أنت۔ زوراکیں ٹولی و ملکءِ چاریگ وتی سیتانی پاسپانی و خاصیں مقصدےءَ کار کن أنت۔ مردمانی بنیادی جیڑوانی ٹھینگا آ دلگوش نہ دی أنت۔"

داکٹر مالک بلوچءَ سرکچ دات " بلوچستانءَ چاریگانی گار کتگیں مردمانی جیڑہ یک ھژدرییں جیڑوے إنت، بلے واکدار پہ إے جیڑہ ٹھینگ سِتک نہ إنت۔"

روچتاک انتخابءِ منـّتا

نشنل پارٹیءَ کمبر چاکر و الیاس نظرءِ کؤش ایر جت

نشنل پارٹیءِ گوانکوا بیانے تالاں کتگ کہ ایشیءِ تھا پاکستانی واکانی دستا بلوچ ورنائیں جھدکار کمبر چاکر و الیاس نظرءِ کؤش ایر جنگ بیتگ۔

دوئیں جھدکارانی تیر آماچیں جسد زییں روچا تربت – پسنی راھا مردماں دستا کپتگ انت۔ ایشانی جسداں لٹ کٹءِ نشان ھم بے حسابا ودی بیتگ انت۔

ماں روچتاک توار شنگ بیتگیں نشنل پارٹیءِ بیانا گشگ بیتگ کہ پاکستانی واک پہ زانت بلوچستانءِ جاوراں خراب کنگا دستگٹ انت۔

بیانا شہ سرجمیں انسانی حقانی پانکجن و سیاسی گلاں دستبندی کتگ کہ بلوچستانءِ سرا بیوکیں زوراکیانی خلافا ھؤردستیا جھد بہ کن انت۔

قومانی پجّار آوانی زبان انت: نشنل پارٹی

نشنل پارٹی –بلوچستان ھنکینءِ صدر داکٹر یاسین بلوچءَ گشت کہ قومانی پجّار آوانی ماتی زبان انت و بے زبانےءَ ھچ قوم سرجم نہ بیت انت۔ پمیشا بلوچستانءِ ماتی زبان وانینگ بہ بنت۔

داکٹر یاسین بلوچءَ سرکچ دات کہ نوکتریں پولکاری شون دی انت کہ ماتی زباناں وانوکیں زھگ شرتر دیمروی کن انت۔ پمیشا آزادیں قوم وتی زھگاں ماتی زباناں درس دی انت۔

داکٹر یاسین بلوچءَ گشت "پاکستانءِ ردیں پالیسیانی سببا ادا جاھمنندیں قوم شہ یکـّا دگرا دیر شتگ انت و ملکءِ خلافا پادمالیں قومانی دلاں کینگ رُستگ۔"

آئیا دیمترا درائینت "مرچی خیبر پختونخواہءِ سرکارا اودا ماتی زبانا وانینگءِ فیصلہ کتگ۔ ماں سند چہ زمانگا ماتی زبان وانینگ بیگا انت۔ ضروری انت کہ بلوچستانءِ سرکار ھم اے تکا گامگیج بہ بیت۔"

داکٹر یاسین بلوچءَ دیمترا گشت "ریاستءَ نیں پرگنگ حق داتگ انت کہ آ درسی کتاباں وت اڈ بہ کن انت۔ بلوچستان سرکار شہ اے آزادی سوب چست بہ کنت و پہ اِدءِ وانوکاں بلوچستانءِ تاریخ، دودمان و لبزانکءِ ھمردیا کتاب اڈ بہ کنت۔"

روچتاک انتخابءِ منـّتا