نشنل پارٹیءِ یک دیوانے کماشیں راھدربرانی یادا ماں پنجگور حاجی صالح محمد بلوچءِ لوگا برجم دارگ بوت۔ دمگا نندوکیں نشنل پارٹیءِ بازیں جھدکاراں دیوانا بھر زرت۔ گلءِ راھشوان رحمت علی بلوچ، پولین بلوچ، حاجی صالح محمد بلوچ، حاجی محمد اسلام بلوچ، کامریڈ خالد بلوچ، عبدالواحد اڈوکیٹ، علاؤالدیں اڈوکیٹ، بی اس او ۔پجارءِ دمگی آرگنائزر افتخار کریم بلوچ، یاور عباس بلوچ و دگہ جھدکار دیوانا نندوک اتنت۔
نشنل پارٹیءِ لیبر سکریٹری واجہ رحمت علی بلوچءَ تران کناں گشت کہ نشنل پارٹیءَ وتی بزرگیں راھدربر ناکو صوالی بلوچ و ناکو درمحمد بلوچءِ داتگیں قربانیاں ھچبر نہ شموش اَنت۔ ھمیشانی داتگیں قربانیانی برکتا ماں دمگا نشنل پارٹیءِ نام جکستگ۔ آئیا سرکچ دات کہ نشنل پارٹی نظریاتی جھدکارانی یک عظیم گلےءِ اِنت و اے گلا ماں سیاسی پڑا گوں جمھوری راھبندا جھد کتگ و ھر تکا بلوچ قومءِ نمایندگی کتگ۔
”بلی توریں مشکل و زوراکی برجاہ اَنت، پدا ھم گوں سیاسی سلاحاں سلاحبندیں نشنل پارٹیءَ وتی کونسل سیشن گوں سوبینی برجاہ داشت۔ و دنیاءِ دیما ثابت کت کہ بلوچ قوم برحقیں گل نشنل پارٹی اِنت“ رحمت علی بلوچءَ دیوان سرکچ دات۔
آئیا گیش کت کہ نشنل پارٹیءِ تچک و راستیں راھبندءِ سببا نگیگ بیتگیں اسٹبلشمنٹ و آوانی ایجنٹ جھدا اَنت کہ مردمانی دلاں بد بہ کن اَنت تانکہ نشنل پارٹی و دگہ قومپرست سیاستکارانی نیاما دلچلّی ودی بہ بیت، و قومءِ سیاسی واکا بہ پروش اَنت۔ مردماں سرپد بیگ لوٹیت کہ نشنل پارٹی سلاحبندی جنگءِ خلافا نہ اِنت، نے کہ سلاحبندیں جھدءِ دیما اوشتاتگ۔ ”مئے جھدا وتا راھبندے ھست اِنت، البت، منزل یک اَنت“ رحمت بلوچءَ پدّر کت۔
رحمت بلوچءَ سرکچ دات کہ قومی جنگا پشتا تھلانک دیگءِ پندلا جنرل مشرفءِ پشتپدیں سرکاری ٹولی ھوار اَنت۔ ایش سرکاری وسیلہ و آسراتیاں کارمرز کنگا اَنت و بلوچ قوما آوانی زھگانی ٹپ ٹوریں جسداں تحفہ دیگا اَنت۔ ایشیءِ کشا نشنل پارٹیءِ راھدربر و جھدکاراں ھم کشگا اَنت۔ ھمے عناصرءِ سببا بلوچ قوم وتی عظیم قومی ھیرو نواب بگٹی و میر بالاچءِ شھادتاں سگگا مجبور بوت۔ چدا ساری مشرف اش نبیس ات و دات کہ بلوچستانءَ فوجی کاروائی بہ کنت۔ اے راستی مشرفءَ وت منّ ات و گشت ‘ابید شہ سئے سرداراں، آدگہ پھک گوں ما ھمراہ اَنت‘۔
”نشنل پارٹیءِ رشتگ گوں بلوچ قوم و بلوچستانءَ بستگ۔ پہ ایشاں ندر بیگا ما ھچبر چک پد نہ بیتگیں۔ نے کہ ما بلوچستان بُھا کتگ۔“ گوں ھمے گپا رحمت بلوچءَ وتی تران سرجم کت۔
اودا تربتءَ نشنل پارٹی و بی اس او ۔پجارءِ راھشوناں عیدءِ درگتا دعوتے کتگ۔ دعوتا داکٹر عبدالمالک، میر اسلم بلیدی، میر اکرم دشتی، انجنیر حمید بلوچ، قاضی غلامرسول، بی اس او ءِ چیردستیں چیرمین زبیر رحمان بلوچ و دگہ جھدکاراں بھر زرتگ۔ اے دعوتا مینگل پارٹیءِ سردار دودا خان درزادہ، میر یعقوب و عبدالمجید دشتی اڈوکیٹ ھم آتکہ بیتگ اَنت۔ بلوچ ٹوڈے
هیچ نظری موجود نیست:
ارسال یک نظر
وتی کلوا چێرا نبیس إت