نشنل پارٹیءِ بنجاھی کمیٹیءِ دیوانے کوئٹہءَ سرجم کنگ بوت و گوں ایشیا پارٹیءِ چیردستیں صدر میر حاصل بزنجوءَ تران کت۔ وتی ترانا میر حاصلءَ گشت کہ پہ جمھوری رواجءِ بالادستیا، قومی حاکمیءِ پچگرگا، سرجمیں مڈیانی دستگرگا و آوانی وارث بیگءِ حقا گرگا نشنل پارٹیءِ جھد برجاہ دارگ بیت اِنت۔
حاصل بزنجوءَ گیش کت: وتی ملکتانی سرا اسلام آبادءِ واھندیا ما ھچبر اوپار نہ کنیں۔ نے کہ شہ وتی بنی حقاں دستبردار بی ایں۔
آییا سرکچ دات: پاکستان یک باز قومیں ملکے اِنت۔ ادا نشتگیں قوم برابری راھبندا وتی حقانی لوٹوک اَنت۔ ریکو ڈک، بہ بیت یا سندک، اشکر بہ بیت یا دگہ معدنی مڈی؛ اے بے دروریں خزانوانی واھند اجازت نہ دی اَنت کہ اسلام آباد ایشاں آدْرہ بہ کنت۔
حاصل بزنجوءَ سوج دات کہ غیر ضروری جیڑواں وتی وھدا باھینگءِ بدلا شرتر اِنت اھمیں ایشوزءِ سرا جھد کنگ بہ بیت۔ پاکستان گوں ھمساھگیں ملکاں دوستی بہ کنت و وت پشت بہ کپیت و دگرانی پشت کپگا منّوک بہ بیت۔
بلوچستانءَ کشگ و دور دیگ بیتگیں لاشانی باروا میر حاصل بزنجوءَ دلپدردی درشان کت و گشت کہ اے رستری کاراں بنجاھی سرکار، پرگنگی سرکار و چاریگ ھوار کار اَنت۔ اگر ایشاں وتی کارکرد شر نہ کت اَنت، گڈا برورد اش سک بیمناک بی اَنت۔
گڈسرا اے گپ ئی گیشینت کہ مردم سیاسی و جمھوری پڑا جھد کنگءِ سکین دیگ بہ بی اَنت۔ پرچاکہ استمانی واکءِ راھا مردم سوبین بیت کنت۔ نشنل پارٹیءِ خلافا جوڑ کتگیں پندلاں استمانی واک پرؤش دات کنت و بلوچستانءِ مزنتریں گل بیگءِ سببا اے کارا کنگ نشنل پارٹیءِ ذمواری اِنت۔ توار
هیچ نظری موجود نیست:
ارسال یک نظر
وتی کلوا چێرا نبیس إت