جمھوری وطن پارٹیءَ مینگل پارٹیءِ سروک کچّہ چت

جمھوری وطن پارٹی (طلال بگٹی) بلوچستان تکءِ کارگشاد میر نصیب اللہ شاھوانیءَ مینگل پارٹیءِ سروک کچّہ چِتگ و گشتگ کہ وھدے شھید اعظم نواب اکبر بگٹیءَ پہ ساحل و وسایلانی رکّینگا شہ بلوچان ھواریا جھد کنگءِ لوٹ کتگ ات، گڈا مینگل ٹولیا پچیں دیواناں نواب طنز کت۔ پدا ھواریں جھدءِ بے سوب کنگا پندل اش ساز اِت۔ جمھوری وطن پارٹیءَ سردارزادہ اختر مینگلءِ یک بیانےءِ نام گپتگ و گشتگ کہ ایشی شھید اعظم نواب اکبر بگٹیءِ کِشکا راھییں مردماں تاوانبار کنگءِ پندلے اِنت۔

جے ڈبلیو پیءِ بیانءِ ردا مینگل ٹولیا نہ پیسرا بلوچستانءِ و ادا نندوکیں عوامءِ فکر بیتگ، نے کہ ھنّی ھست اِنت۔ آ بس جھدا اَنت کہ چیریں دستانی کمک اش بہ رسیت دانکہ واکدار جوڑ بہ بی اَنت۔ دریں ملکاں نندگ و حالتاکی بیان شنگ کنگءِ بدلا سردار زادہ مینگلءَ ملکا چھْر کنگ لوٹیت۔ پرچاکہ لاش رستگیں کٹمانی اندوھاں ایرموش کنگءِ پڑا جھد کنگءِ ضرورت اِنت۔ تچکیں راہ نوابزادہ طلال بگٹیءِ ڈولا دشمنءِ دیما مکّ بیگ و پہ بلوچستانءِ حقاں کوکّار کنگ اِنت۔ ڈیلی بلوچ