عراق و اقوام متحدہءَ ایرانی پناھگیرانی کمپا بندگءِ قرارے بست

ماں عراق ھستیں 3000 کساں گیشءِ ایرانی پناھگیرانی کمپےءَ بندگءِ قرارے عراقی سرکار و اقوام متحدہءِ نیاما بندگ بوت۔ قرارءِ ردا ‘اشرف‘ کمپ بندگ بیت و سرجمیں پناھگیر دگہ جاگھےءَ سرجم کنگ بی اَنت۔ شہ اودا اقوام متحدہ ایشاں دگہ ملکاں راھی کنگءِ بند بستا کنت۔ اشرف کمپ 1980ءِ دھرا جوڑ کنگ بیتگ و ادا شہ ایران تتکگیں مجاھدین خلقءِ باسک پناہ دیگ بیتگ اَنت۔ ایشاں گوں عراقءَ بیوکیں جنگءِ درگتا ایرانءِ خلافا جنگ ھم کتگ۔ گوں صدام حسین رژیمءِ پرؤش ورگا عراقءِ نوکیں سرکارا کہ ایرانءِ حمایتی اِنت، کمپا بندگءِ فیصلہ کت۔ البت، پہ پناھگیراں جاگھے نہ بیتگءِ سببا اے فیصلہ اقوام متحدہءِ واھگءِ سرا مھتل بیتگ۔ بی بی سی