دگہ راھانی بند بیگا پد پہ کاربارا ایرانءَ دیم گوں افغانستانءَ کت

ھندوستانءَ شہ چابھار تانکہ افغانستانءِ پرگنگ بامیانءَ ریل راھے جوڑ کنگءِ منصوبہ کتگ

ایرانءِ سرا یورپی و امریکایی بندشاں رند گوں ایرانءَ کاربار کنوکیں ملک افغانستان و پاکستان پشت کپتگ اَنت۔ گوں افغانستان کاربار کنگءِ برکتا اودا نشتگیں ناٹوءِ واکانی بنی ضرورت ھم پیلو بی اَنت۔ اے ردا مرچی یک قرارے ماں تھران دستنشان جنگ بیگا اِنت۔ ایشیءِ ردا افغانستانءَ سوچگی تیل، گیس و دگہ بنی ضرورت شہ ایرانءَ پہ بھا رس اَنت۔ ایرانءَ دراتکگیں 300000 ٹن مال افغانستانءِ گورا بھا کنگ بیت۔

برزاد داتگیں حالءِ کشا ایرانءِ تھران ٹایمزءَ گیش کتگ کہ سال 2011ءِ یازدہ ماھاں دویں ملکاں 2 بیلین ڈالرءِ کاربار کتگ۔ ایشیءِ تھا 1.5 بیلین ایرانءِ مال بیتگ اَنت کہ افغانستانءَ زرتگ اَنت۔ اے نیاما گیشتر درمان، سیمنٹ، آسن، اسٹیل، گدشودی پوڈر و گاسلیٹ بھا کنگ بیتگ۔ ھمے باروا ماں تھران نندارینتگیں افغانستانی سفیرا گشتگ کہ دویں ملکانی نیاما کاربار تانکہ 6 بیلین ڈالراں رس اِت کنت۔

گوں افغانستان بیوکیں کارباری رابطوانی آسودگ تر کنگا ایرانءَ شہ بلوچستانءِ بندنی شھر چابھار تانکہ کابلءَ بالیگرابی سفرءِ راھا پاچ کنگءِ فیصلہ ھم کتگ۔ ھمے راھا گیشتر غیر فوجی درملکی کالا افغانستانءَ رسینگ بیگا اَنت۔ شہ یورپ و اِشیاءَ لڈتگیں کالا دبئیءَ و شہ دبئیءَ چابھار برگ بیگا اَنت۔ پدا شہ اودا لاریاں لڈگ و تچکا افغانستانءِ قندھار شھرا رسینگ بیگا اَنت۔