مکرانءَ یک دستگیر بیتگیں بلوچےءِ لاش رس ات، کویٹہءَ یکے گشگ بوت، دالبندینءَ ڈونگانی آوار جتگیں تاجرے یلہ بوت، ڈیرہ بگٹیءَ گیس پایپ و تیل رسینگی ٹانکر تباہ کنگ بوت اَنت

بامءَ شنگ بیتگیں حالےءَ داتگ کہ کیچ ۔ پسنی راھا ماسٹر غلامقادر بلوچءِ لاش دستا کپتگ۔ ماسٹر چار ماہ ساریا پاکستانی چاریگاں شہ ناصر آباد آوار جتہ بیتگ۔ آیی محمد بخش پدنام کمانڈر جگوءِ برات بیتگ۔

پاکستانءِ روچتاک جنگءِ ویبسایٹا شنگ بیتگیں حالےءِ ردا کویٹہ سریاب دگءَ امان اللہ نامیں سایکل سوارے تیر جنگ، کشگ بیتگ۔ کشوک زانگ بہ بیتگ اَنت۔

ڈان حالتاکا داتگ کہ کراچیءَ پلپانچ کنگءِ میارا یک عارف نامیں بلوچے پولیسا کشتگ۔ عارف لیاریءِ نندوکے بیتگ۔ پولیسءِ ردا آییا گوں ھمراھےءَ ماں شھرءِ آرام باغ ھندا دکاندار پلپانچ کتگ اَنت۔

ڈیلی بلوچءِ ردا بلوچ رپبلکن آرمیءَ حال داتگ کہ سرکاری واکاں سوچگی تیل رسینوکیں ڈانکرے آییءِ مردماں ڈیرہ بگٹیءَ گوں بمبےءَ تباہ کتگ۔ ایشیءِ ڈرایور کشگ بیتگ۔ پیرکوہءَ گیس رسینگءِ 16 انچی پایپے ھم تراکینگ بیتگ۔

شہ دالبندین دو ماہ ساریا پہ لب گرگا آوار جنگ بیتگیں تاجر عبدالمناف رخشانیءِ آزادیءِ حال روچتاک توارءَ شنگ کتگ۔ پولیسءِ ردا آوار جنوکاں شہ پولیسءِ ترسا تاجر رنبینتگ و تتکگ اَنت۔