امریکاءَ پہ ایرانیاں وتی انٹرنٹی سفارتے پاچ کتگ

اے جاگہ پہ شما ایرانیان اِنت ۔ ۔ ۔

1979ءِ جارواں ھر کس سھیگ اِنت؛ ایرانءِ اسلامی انقلاب، امریکایی سفارتءِ سرا بیڑ و اودا کار کنوکیں مردمانی بندیگیءِ باروا ندارگ و سیاھگ باز شنگ بیتگ اَنت۔ دنیا ھمے سرپد اِنت کہ ما وتی ایرانی سفارت باھینتگ۔ البت، مئے گمانا ما شہ یک سفارتےءَ باز گیشتر شہ دستا داتگ۔ گوں ایرانءِ مردماں مئے رشتگ سندگ بیتگ، ایرانی چاگرد شہ مئے دسترسیا دیر برَگ بیتگ و ھر روچ ھزاراں ایرانی و امریکایی مردمانی گدارءِ راہ شنْک جَنَگ بیتگ۔ گوستگیں سییں سالاں سویزرلنڈءِ سفارتا شاباش بات کہ مئے کونسلری و انسانی تکءِ کار ئی گیشینتگ اَنت، بلہ ایرانءَ امریکاءِ وتی حاضر نہ بیگءِ سببا ما وتی توار ایرانی مردمانی گوشاں رسینت نہ کتگ۔

ایرانی سرکار باز جھدا اِنت کہ درملکی حال و سکین آییءِ چاگردا تالان مہ بی اَنت۔ دگہ زوراکیں سرکارانی وڑا ایران ھم جھدا اِنت کہ پہ وتی مردماں چارگی، اشکُنگی، سسایی و مارشتی سرپدیانی دیما بہ داریت۔ پہ اے مقصدءِ پیلو کنگا یک برقی پردوے مردمانی اَنگِرّا جنَگ بیتگ۔ رسانکاں ایوکا واھتگیں چیز شنگ بی اَنت، انٹرنٹءَ گر بند اِنت، رابطہ چارگ بیگا اَنت و درملکی رسانکانی دیم ئی داشتگ۔ المّا اے گرانیں توجیل مرچییں دورا بے سوب بیان اِنت۔ اے ڈولیں کارکرد گوں مئے دو بُنی ارزشتاں جنْگ ور اَنت۔ یکے لیکواں درشان کنگ و دومی شنگ کنگءِ آزادی کہ ایشانی برکتا مردم اواریں لیکواں چار ات و شرتریناں گچین کت کن اَنت۔ اے وڑا مردم سرپد تر بی اَنت و جمھوری چاگردانی شرتریں باسک جوڑ بی اَنت۔ فارسی زبانا بیتگیں مئے بنداتی بحثاں مارا شہ ایرانءَ سرپدی رستگ کہ اودءِ مردم امریکاءَ سفر کنگءِ باروا، ادا وانگ دربرگءِ آسراتیاں و ایران و جھانءِ باروا مئے راھبندا زانگا واھوک اَنت۔

ھمے واھگا ما امبری فیس بوک و ٹویٹر تاکدیم پاچ کت اَنت۔ شہ ایرانیاں رستگیں راھشونیانی برکتا ما فیصلہ کت کہ یک نوکیں چیزے جوڑ بہ کنیں؛ یک ویبسایٹے پہ ایرانیاں ۔فارسیءَ جوڑ کنگ بہ بیت۔ ایشیءِ راھا شما سرپدی دات کن اِت کہ چے لوٹ ات و پرچا۔ ما تھران انٹرنٹی امبسی جوڑ کتگ، دانکہ شمارا امریکاءِ باروا گیشتر سرپدی بہ بیت۔ و ماں ایران و درملکاں ایرانی سرکارءِ دسگٹیانی باروا مئے نگیگیاں گیشتر بہ زان ات۔ پدا بہ گند ات کہ ما ایشاں ٹھینگءِ پڑا چے کنگایں۔

اے ویبسایٹ منّتگیں سفارتے نہ اِنت، نے کہ ایرانءَ امریکہءِ پدلیں سفارتءِ بستارے ایشیا ھست۔ البت، وھدے کہ مارا تچکیں رشتگ نیست، ایشی امریکایی و ایرانی مردمانی نیاما پُھْلے جوڑ کرت کنت۔ ھنچوش کہ صدر اوباماءَ سالءِ بنداتا گشتگ ات و پدا درملکی کارانی وزیر ھلری کلنٹونءَ ماں صداءِ امریا و بی بی سی مراگشاں ھمے گپ پَلّیس داتگ ات ”شما، ایرانءِ جوانسالانی پشتا فارس تمدنءِ شرّیانی دپتر ھست اِنت و باسکاں اے واک کہ وتی ملکا ڈولے بدل کن اِت کہ شمئے مارشتانی نمایندہ بہ بیت۔ شمئے سرپدی، شمئے امید و شمئے گچین کتگیں راہ ایرانءِ آیندوا جوڑ کنت، و دنیاءِ براھدار کنگا کمک کنت۔ بلّی توریں گندگا جاور تھار دیم اَنت، بلہ سرپدی دیگ لوٹاں کہ من شمئے پشتا اوشتاتگاں۔“

ھمے باروانی ھمردیا ما تھران انٹرنٹی ایمبسی جوڑ کتگ۔ ایشی پہ ایرانی مردماں مئے بنجل اِنت۔ ایشی شمئے جاگہ اِنت و ما امید کنیں شما گوں ما ھمراہ بی ات۔

ھمے سیاھگ؛ فارسیءَ ، انگریزیءَ