یکشنبہءَ ماں روس بیتگیں گچینکاریا بے راھبندی بیتگ: گورباچوف

سوویتءِ گڈی صدر میخایل گورباچوفءَ گوستگیں یکشنبہءَ ماں روس بیتگیں گیچنیاری کچّہ چِت و لوٹ کت کہ پدا گچینکاری کنایینگ بہ بیت۔ گوں روسءِ انٹر فکس حالجاھا وتی کتگیں گپاں آییا گیش کت ”ملکءِ سروکان منّگی اِنت کہ مزنیں حسابےءَ بے راھی بیتگ اَنت، ووٹانی پیٹی مانْچِنگ بیتگ اَنت، و شنگ کتگیں نتیجہ گوں مردمانی واھگاں ھمرد نہ بی اَنت۔“

ھشتاد سالگیں پیسری لیڈرا گیش کت ”مردمانی واھگاں ڈالچار کنگءِ سببا واکدارانی ارزشت جھل کپیت و جاور شہ دستا ڈن رو اَنت۔“

چارشنبہءَ پولیس بالگرد ماسکوءِ آسمانءَ ترّتگ اَنت، چار راھانی سرا پولیساں پرّیں ٹرک اوشتوک بیتگ اَنت و 50 ھزار پولیس دگاں ترّگا بیتگ اَنت۔ واکدارانی ردا پیشی شپءِ مِیڑیانی درگتا 550 مردم دستگیر کنگ بیتگ اَنت۔ البت، سرکاری ٹلیوژنءَ اے سرجمیں حالانی یک گالے ھم شنگ نہ کتگ۔

سرکار مخالفاں آیوکیں 10 روچاں 4 مزنیں میڑی سرجم کنگءِ جار جتگ۔ اولی میڑی شنبہءِ روچا شہ کِرمْلِن 50 میٹر دیر ماں انقلاب چار راھا بیگی اِنت۔ اجازتنامہ پہ 300 مردماں دیگ بیتگ، بلہ فیس بوک و دگہ جاگھاں 23000 مردماں بھر زیرگءِ زبان داتگ، و دگہ 15000 مردماں گشتگ کہ بلکیں بھر بہ زیر اَنت۔ صداءِ امریکا