باریں شیعہ بھتاور تر اَنت یا سنّی

پاکستانءِ توکی کارانی وزیر رحمان ملکءَ طالبانی منّت گپت اَنت کہ امبری شیعوانی سرا وتکش بیڑ اش نہ برت و شیعہ اش نہ کشت اَنت۔ طالب کہ کٹر خیالیں سنی اَنت، شیعواں کافر لیک اَنت و براں برانا آوانی سرا بیڑ بر اَنت، و مزنیں حسابےءَ کش اَنتش۔ خاص محرمءَ کہ امام حسینءِ شھادتءِ سالروچ اِنت، گیشتر شیعہ کشگ بی اَنت۔ البت، امبری پاکستانءَ شیعوانی سرا ھچ بیڑ برگ نہ بوت۔ رحمان ملکءَ ساریا شہ پاکستانی طالباں دستبندی کتہ بیتگ کہ شیعواں مہ کش اَنت۔ نیں کہ محرمءِ میڑی کٹتگ اَنت و ھچ شیعہ کشگ نہ بیتگ، رحمان ملکءَ طالبان ئی منّت گپت اَنت۔

البت، ھر جاگہءِ شیعہ پاکستانیانی ڈولا بھتاور نہ بیتگ اَنت۔ ماں افغانستان و عراق ایشانی مچّی بمبتراکانی آماچ بیتگ اَنت و بازیں کس کشگ بیتگ اَنت۔ دگہ لھتے شیعواں امام حسینءِ شھادتءِ غماں وتی جند ھم کشتگ۔

حالانی ردا افغانستانءَ شیعوانی دو مچّی بمبتراکانی آماچ بیتگ اَنت۔ اے بمبتراکاں نزیک 60 کس کشتگ۔ دویں بمبتراکانی نیاما یکّے کابلءَ بیتگ و دومی ماں مزار شریف۔ عراقءَ بیتگیں بمبتراکاں باز کس نہ کشتگ اَنت، بلہ لھتے شہ شیعواں ‘غمءِ حسین‘ءَ وتی جند کشتگ، بزاں وتکُشی کتگ۔

امبرییں محرمءَ مزنتریں کٹ کنوک عراق بیتگ۔ اودا شہ دیناءِ دگہ کنڈانی ھواریا صداں ھزار ایرانی پہ کربلا و دگہ جاگھانی زیارتا شتگ اَنت۔ ایشانی اودا روگءِ برکتا عراقءِ معیشتا مزنیں کمکے رستگ۔ اگر جاور ھمے ڈولا دیما روان بہ بی اَنت، گڈا عراقءِ آمدن شہ سعودی عربءَ گیشتر بیت اِنت، پرچاکہ پہ شیعواں شہ حجءَ روگا گیشتر کربلاءَ زیارت کنگ مقدس تر اِنت۔ گوں عراقءِ امن بیگا دنیاءِ اواریں کنڈانی شیعہ مدام اودا روان کن اَنت و سرمایہ خرچ کن اَنت۔ ایشیءِ سیت عراقءِ معیشتا رس اَنت۔