منا وا شش ماہ اَت بحرینءَ سر بیتگ اِتاں، من ادءِ بلوچانی تب ءُ نفسیاتءَ ھچ سرپد نہ اِتاں۔ چیاکہ من وتی زندگیءِ مزنیں بھرے بلوچستانءِ یک کسانیں میتگےءَ گوازینتگ اَت۔ منی سرجمیں زندگی یک ھنچیں جاھےءَ گوستگ اَت کہ اودءِ مردم چہ دوتل ءُ دوپوستیءَ نابلد اَنت۔ پدا پہ منی وڑیں یک دلپھک ءُ انسان دوستیں مردمیےءَ گُشیگا سرجمیں انسان یک اَنت۔ایشیا ابید درمُلکی نپس گیریں شپاں منا ھنچوش دلگیر کُتگ کہ من ھرکسا وتی ذاتءِ شاھیما توراں۔ چے وتی، چے درامد ، چے درمُلکی ءُ عرب؛ پہ من معنا اش یک اَنت۔ مفتا پرچا نیتا بد بہ کناں، خدا تپش واھیت۔ اگاں منی سرا مرچی یک اسٹبلشمنٹے زوراکی کنگا اِنت، من سرپد بی آں کہ ظلما مذھب و قومیت نیست؛ ظلم ظلم اِنت۔
بلہ بیا کہ یک روچے من ادا دگہ نوکیں آدینکے دیست۔ یک روچے من احمدانی ھوٹلا ورگ وارت ءُ در کپتاں، گڈا منی پجاروکے گوں من دوچار کپت۔ اے مردا یک برے وتی مورْک مُجینت ءُ پدا درائینت ئی ”ترا شاباش اِنت، تو کجا چہ در اَتکگئے۔“
من حیراں بیتاں ءُ چم ھوٹلءِ بورڈءَ سک کُت اَنت۔ ”بیت کنت کہ اے ھوٹلءِ بُرزا دگہ فندق ءُ بلاہ بترے بہ بیت۔ آخر اے مرد چیا منی سرا چو زھر کپتگ۔“
پدا ھمے مرد ا منی حیرانی وت پرؤشت ءُ درائینت ئی ”تو بزاں پاکستانی ھوٹلا ورگ وارتگ! آیندوا چوش مہ کن۔“
من دیم گوں ھمے مردا کُت ءُ گشت ” واجہ تئی وا لوگ ھمدا اِنت، ترا المّا ھوٹلا روَگ نہ کپیت، بلہ منا ادا کس نیست و ارزانیں ھوٹل ھمیش اِنت۔ بلوچاں ادا ھوٹل نیست، عربی ھوٹلاں عربی یک گالے ھم من نہ زاناں، انگریزی ءُ تُرکی ھوٹلانی بل گران اَنت کہ منی وسا ڈن اَنت۔ پدا منی یکیں دینارءَ نہ پاکستانءِ معیشت مضبوط بیت نے کہ منی وراک نہ ورگا آئی ءِ معیشت تاوانبار بیت۔ اگر من بزاناں کہ پہ منی یکیں شاما پاکستان پروشیت، گڈا من شد لاپیا وتی روچ تھلانگ داتگ اتنت۔“
هیچ نظری موجود نیست:
ارسال یک نظر
وتی کلوا چێرا نبیس إت