ایرانی ملایانی فتواءَ رند ایران و اسلامی رواجءِ مخالف آذرباییجانی ندکارے کشگ بوت

رفیق تقی ۔بی بی سی فوٹو

جمھوری آذرباییجانءِ رفیق تقی نامیں 61 سالگیں ندکارے کہ 19 نومبرءَ ماں باکو کارچ کنگ بیتگ، چار روچاں رند ٹپانی درداں نہ سگگءِ سببا بیران بیتگ۔ ایشیا وتی سیاھگاں ایران و اسلام سک باز کچّہ چتگ اَنت۔ پمیشا ایرانءِ بازیں ملایاں ایشیا کشگءِ فتوا داتہ بیتگ و نیں کہ کشتگ اش، ملایاں کشوکءِ کارکرد ساڑایتگ۔ رفیق تقیءِ جندا شہ وتی مرگا ساری بیان داتگ کہ آییا کارچ کنوک ایرانءِ ایجنٹے بیتگ۔

مسلماناں زھر براینوکیں آییءِ اولی سیاھگ 2006ءَ ‘سَنَت‘ نامیں ھفتگ تاکےءَ شنگ بیتگ۔ آییا نبیستہ بیتگ کہ اسلام و جمھوری رواج ھوار بوت نہ کن اَنت۔ ھمے سیاھگا حضرت محمد ئی ھم کچّہ چتگ۔ ایشیا رند بازیں ایرانی ملایاں تقیءَ کشگءِ فتوا داتگ۔ آذرباییجانءِ سرکارا ھم رفیق تقی و ھفتگ تاکءِ شونکار ثمیر صادق ھشت ماہ جیل کتگ اَنت۔

البت، فتوا و جیلا رفیقءِ دیم داشت نہ کتگ و آییا 10 نومبرءَ ماں بلاگےءَ نبیستگ ”ایران یک وابے اِنت کہ آسودگیا پروشیت“۔ ھمے سیاھگا آییا ایرانی صدر محمود احمدی نژاد سربتگیں مردمے نامینتگ۔

رفیق تقیءِ مرگا رند ایرانءِ آیت اللہ محمد لنکرانیءَ خداءِ شکر گپتگ کہ آییا آذرباییجانی مسلمانانی نیاما یک عزتمندیں مردمے پہ اسلامءِ توھین کنوکیں شیطان کشگ و جھنمءَ راھی کنگا ودی کتگ۔ البت، باکوءَ ایرانی سفیرا اے کؤشءِ تھا وتی ملکءِ دستھواریءِ گپ نہ منّتگ۔

آذرباییجانءِ سرکار مخالفاں کچّہ چتگ کہ سرکارا رفیق تقیءَ رکّینگءِ ھما وڑیں بند بست نہ کتگ، ھنچوش کہ برطانیاءَ پہ وتی شھری سلمان رشدیءِ رکّینگا کتگ اَنت۔ ”سرکارءِ ذمواری ات کہ رفیق تقیءِ حفاظت ئی بہ کتیں ات و آییءِ خلافا فتوا دیوکیں آذرباییجانی مردم ئی دستگیر بہ کتین اَنت۔ ایشیءِ کشا درملکی فتوا دیوکانی خلافا میانملکی بندش جنایینگ بیتین ات“ پولکار ارستون اوروجلوءَ گشتگ۔

”ابید شہ آذرباییجانءِ سرکارا سرجمیں دنیا اے کوشا چست ایر کنگا اِنت“ لیگل سنٹرءِ سروک اتقام علیوءَ وتی شنگ بیتگیں بیانےءَ گشتگ۔ ”سرکار ھما ڈولا بے تْرک توار کہ چدا ساری شونکار حسینوءَ کشگءِ وھدا، حالکارانی آوار جنگ و گاڑیانی پرگانی چیرا ٹپی کنگ، و مردمانی لوگاں ماندارگءِ وھدا بیتگ۔“

حالکارانی حقاں پانکجنوکیں دو امریکایی ٹولیاں شہ آذرباییجان سرکارا لوٹ کتگ کہ رفیق تقیءَ جنوک یا جنوکاں دستگیر و دادگاھی بہ کنت۔ آذرباییجانءِ واکداراں گشتگ کہ آ بالکل ھمے کارا گولایش اَنت۔ اے ردا واکدار علی حسنوءَ گشتگ کہ سرکار سرجیمیں کیسانی سرا کارا گولایش اِنت۔ پمیشا کچّہ چن ودار بہ کن اَنت۔ یوراشیا نٹ