 |
| سردار مینگل ۔بی بی سیءِ عکس |
بلوچستانءِ مینگل ٹکءِ پیرسال و بلوچستانءِ سیاستءِ خطرناکتریں سردار عطاءُاللہ مینگلءَ گوں بی بی سی وتی گالگدارےءَ گشتگ کہ مینگل دمگءِ ھچ مردم گوں بلوچستانءِ سلاحبندیں جنْگا ھوار نہ اِنت۔ البت، شہ دمگا ڈن نندوکیں مینگل جنگا گون اَنت۔
آزادیءِ جنگءِ باروا سرکچ دیاں سردار مینگلءَ گشتگ کہ آزادی لوٹوکاں چارگ لوٹیت باریں آ وتی ملکا آزاد کرت کن اَنت یا نہ! اگر ملک اش آزاد کرت باریں وتی آزادیا برجاہ داشت کن اَنت!؟
آزادی لوٹوکاں ترسیناں سردار مینگلءَ سرکچ داتگ ”دو ملکانی سیمسر گوں پاکستانءَ لچّتگ اَنت و بلوچانی دفاعی واک نیستی ھم درور اِنت۔ اے حالتا ملکءِ آزادی چونکا برجاہ دارگ بیت کنت؟
”دمگ شہ آسراتیاں سراگاہ اِنت، اگر شہ پاکستانءَ درکپتیں، رندا مئے حالت چے بیت؟ اگر دگہ راھے ھست وا شر اِنت، بلہ نیستیءِ حالتا شہ یک مصیبتےءَ درکپیں و دگہ مصیبتےءَ مانگیشیں۔“
گوَستگیں گچینکاریا تھْروز کنگءِ باروا گپ کناں سردار مینگلءَ گشتگ کہ آییا تھروزیءِ پلانگری نہ زُرتگ، پارٹیءِ فیصلہ بیتگ کہ آییءِ گمانا بے نپیں فیصلوے بیتگ۔
ووٹاں بھْر زیرگءِ حالتا مزاحمتکارانی مخالفتءِ باروا جستےءَ پسّہ دیاں سردار مینگلءَ درّاینتگ کہ آیی دگرانی حکمءِ پابند نہ اِنت۔
بی بی سیءِ اے جستءِ پسّوا کہ سردارانی زھگ شہ ملکا در اَنت و جنگءِ پڑا ایوکا نیزگارانی زھگ مرگا اَنت، سردار مینگلءَ کمے بیتواریا رند پسّہ داتگ کہ فوجءِ کشگ بیتگیں مردم ھم نیزگارانی زھگ اَنت۔ مراعات یافتہ و زبھریں مردمانی جنگ شہ زمانگ مڑگ بیتگ اَنت۔
سلاحبندیں جنگول و سرکارا صحل بندگءِ مقصدا نیامجیءِ مردم بیگءِ باروا وھدے شہ سردار مینگل جست کنگ بیتگ، گڈا آییا سرکچ داتگ ”مشاھد حسینءِ پارلمانی کمیٹیءِ برورد (شھید اعظم نواب) اکبر بگٹیءِ کؤش بوت۔ شہ آییا پد (نواب) خیر بخش مری یا منی باریگ کئیت۔ من اے تنْدا وتی گوٹا بندگا ساڑی نہ آں۔“
هیچ نظری موجود نیست:
ارسال یک نظر
وتی کلوا چێرا نبیس إت