مغربی بلوچستان: خاصین حال چہ ارنا و راڈیو بلوچی

موتء سوداگرے زاھدان درنجگ بیت

زاھدانء پبلک پراسیکیوٹرءَ حال داتگ کہ یکشنبہء روچءَ زاھدانء بندیگجاہءَ یک موتء سوداگرے درنجگ بیتگ۔ آئی مھلوکءَ دلجمی داتگ کہ قانون گون مرگء سوداگر، فسادکار و ایمنیء دشمناں ترندیءَ دیم پہ دیم بیت انت۔ ارناء اے حالا درتکگینء باروا گیئشتر گشگ نہ بیتگ۔

سیستان و بلوچستانءَ ایمنیء 44 دشمن دستگیر

صوبہء انتظامی نمایندہءَ حال داتگ کہ ایمنیء 44 دستمانجن دستگیر کنگ بیتگ انت۔ صلاح عسگرپور یکشنبہء روچءَ سرکاری حالرسینوکان گشتگ؛ گوستگین چیزے روچان زابل، زاھدان، ایرانشھر، خاش و چاہ بھار شھران اے مھلوکء گرگا سرکاری واک سوبین بیتگ انت۔

اے ٹولی فسادکاری، دزی، مردم کشی، رھزنی و گون سرکاری واکان جنگ دیگء ڈوبھان دستگیرکنگ بیتگ انت۔ جست پرس کنگا چہ رند اے 'اصلاح' کنوکانء دستا دیگ بیتگ انت۔

یک دگہ حالےءَ ارنا قولء سرکاری واکان نبیستگ کہ دگہ 16 توبہ کاران وتا سرکاری واکانء دستا داتگ۔ اے مردم گيئشتر کورین و قلعہ بیدء ھندان وتی بدین عملان گلائیش بیتگ انت۔

چہ زاھدانء دود ربیدگی بنجاہءَ بلوچانء کشگ

راڈیو بلوچي –سویڈنء جھگیرءَ چہ زاھدان حال داتگ کہ زاھدانء دود ربیدگی بنجاہء گیئشترین بلوچ کار کنوک در کنگ بیتگ انت۔ اشانء درکنگء سوب سروکان بے زرّی گشتگ۔

حالء ردا صوبہ گورنرء نمایندہ اکبریءَ ھمے ھنیگان گشتگ بیتگ کہ صوبہءَ ھچ مالی مشکل نیست انت۔

چہ کار زبھر کتگین بلوچانء نام انت احمد سپاھی، خلیل بنات زھی، سلطان کرد، محمد نعیم بزرگزادہ، محمد اکبر دھواری، زیتون دھواری، مھران دولتی بخشان، عبداللہ دانش، رخسارہ ریگی۔ ۔ ۔ ۔ ۔