کارے کہ مشرف کت نہ کت، نین پیپلز پارٹیء سرکار کنگا دلمانگ انت؛ براھمدغ

بلوچ راجءِ دوستین رھدربر و بلوچ ریپبلکن پارٹیءِ سروک نواب براھندگ بگٹی وتی یک بیانےءَ گشتگ "ھما کار کہ مشرف کنگا بے سوب بیت نین پیپلز پارٹیءِ سرکارئی کنگا دلمانگ اِنت۔ پہ وتی اِے مقصدءِ دیما برگا لھتے روچان چہ پیسر تا اِے وھدی نزیک صد فوجی گاڑی جیکب آبادءِ راہءَ کشمور، سوئی چاونی، و ڈیرہ بگٹی سر کنگ بیتگ اَنت و دگہ 50 فوجی گاڑی لھڑیءِ راہءَ رسینگ بیتگ اَنت۔ بید چہ اِشان 100 ڈرم (بیرل) فیول پہ گرابان سوئی چاونیءَ رسینگ بیتگ۔

اِے وھدی سوئی چاونی، ڈیرہ بگٹی، پیرکوہ، زین کوہ و اوچءِ فوجی قلاتان بازین فوجی گندگ بیگا اِنت۔ ھوریءَ جیکب آباد ائیر بیس، کشمور و سوئی چاونیان بازین ھلی کاپٹر گن شپ و کوبرا ھلی کاپٹر ظاهراَنت"۔

واجہ براھمدغ بگٹی خیال ظاھر کتگ کہ اِے سرجمین چن لانچ بلوچانءِ سرا پہ یک مزنین یورشےءِ برگا بیگا اَنت۔ آئی مثال داتگ کہ لھتے روچ ساری نوشکیءِ کوھان ھلی کاپٹران بمباری کتگ، پدا پنجگورءَ لوگ پہ لوگ پترتگ اَنت و بازینانءِ ستر پروشتگ اَنت، آنگو تربت و ناصر آباد سیلابزدگانءِ کٹگ مانداشتگ اَنت و مردم بے ساھگ کتگ اَنت، و جنین آدم و چوریگ لٹّ کـٹ کتگ اَنت۔

براھمدغ بلوچ عوام سرپد کتگ "آ چہ چشین سرکاری گامگیجان مہ ترس اَنت۔ چیا کہ فوجءَ چہ وتی اِے ڈولین کارپدان پیسرا ھم ھچ کت نہ کتگ و دیمترا ھم سوبین نہ بیت اِنت۔ ھنچوناھیءَ پیپلز پارٹی سرکار ھر دورا پہ بلوچءِ نسل کشیءَ وتی لانکا بندیت و بلوچان گون یکا دگرا میڑینگ چہ اِے پارٹیءِ پندلان یکے اِنت"۔

براھمدغ بگٹیءِ خیالا "مزاکرات، معافی و مفاھمت پھک دروغ و مکـّاری اَنت۔ چمشکا بلوچ وتی توانائيان پہ مزاحمتءِ تیز تر کنگا بہ گوازین اَنت۔ نیکہ جلسہ و مچّیانءِ سرا"۔ روچتاک توار

بازین کسانءِ خیال اِنت کہ اِے وھدی گون سرکارءَ مزاکرات کنوکین بلوچانءِ دیما مزنترین اوشت بلوچ رپلکن پارٹی اِنت و چہ پھکان ترندترین لوٹان دیما برگا اِنت۔ ھمے لوٹان اِشانءِ اَلائس (بلوچ نشنل فرنٹ) ھم پلانگری زیرگا اِنت۔ بلے لھتے دگہ گل وٹولی ھست اَنت کہ آ نین وتی بے سوبین وھد و شھیدان و ٹپّیانءِ خونان بُھا کنگا بے صبر اَنت۔ اَگر بلوچ رپبلکن پارٹیءِ سروک براھمدغ بگٹیءِ جانءَ خطرے ھست گڈا آ چہ پاکستانی فوجءَ گيئشتر ھمے کیسگ پرستین ٹولیان بیت اِنت۔