زاھدان: بلوچانءِ وت مان وتی چوپت چوپا 4 کشگ، یکے ٹپـّيگ بیت

راڈیو بلوچی اِف اِم سویڈینءِ حالرسینوکین نمایندوا چہ زاھدان حال داتگ کہ یک بیمناکین جنگے کہ دوشی (یکشنبہ 13 جولائیءِ شپ) مان زاھدانءِ نسترین ھندا دو (بلوچ) ٹک کرد و ریگیءِ نیاما بیت؛ 10 کسانءِ کشگ یا ٹپّيگ بیگءِ سبب جوڑ بیت۔

اِے جیڑہ وھدے بندات بیتگ کہ ریگی ٹکّءِ لھتے سلاحبندین مردمان یک لوگےءِ سرا کہ اودا کماش پہ ریگی و کرد ٹکـّانءِ صحل بندگا نندوک بیتگ اَنت، یورش برتگ و چہ نندوکان 4 کس کشتگ۔

چہ اِشی رند کرد ٹکءِ مردمان یورش آروکانءِ سرا تیرگواری تیرگواری کتگ و چہ آوان یکے کشتگ، و دگرے دستگیر کنگ بیتگ۔ پدا سلاحبندین مردمان نادرھجاہءِ سرا کہ اودا ٹپـّیگ دوا درمان بیگا بیتگ أنت؛ یورش برتگ و یک پولیسے کشتگ، و دگہ لھتے مردم ٹپـّيگ کتگ أنت۔ راڈیو بلوچی

مردم اَبکـّہ اَنت کہ چونکا مان یک شھرے کہ فوجءِ دستا اِنت و بید چہ فوجءِ فرمانا گِينـّے ساہءِ زیرگ بیت نہ کنت؛ اِنچوک سلاحبندین مردم تا اِنچوک دئیر مان شھرءِ اَوارین دمکان چپت چؤپ کن اَنت! اِشیءِ توکا سرکاری واکانءِ دستانءِ ھور بیگءِ اِمکان باز اَنت۔

اِیرانءِ سرکاری حالجاہ "فارس نیوز" اِے جَنگا کشگ بیتگین چار کس و ٹپّيگ یکے ظاھر کتگ انت، و دیمترا نبیستگ: ریگی ٹکءِ دو شاھڑانءِ یک صحلبندی دیوانےءِ کـُـٹـّگا چہ رند وھدے مردم چہ لوگءَ درکپتگ اَنت، اِشانءِ سرا حملہ بیتگ کہ اِشیءِ سببا ریگی ٹکّءِ 3 کس جاہ پہ جاہ مرتگ اَنت و دو ٹپـّيگ بیتگ اَنت۔ چہ ٹپـّيگان یکےءَ نادراھجاہءَ ساہ داتگ۔