نواب رئیسانی کوئٹہ پدا پٹان فوجء دستا دات

سئشبنہ 8 جولائی 08 شنگ بیتگین حالان نبیسگ بیتگ کہ صوبہ بلوچستانءِ رئیسانی سرکارءِ دسبندیءِ سرا کوئٹہ شھرءِ انتظام چہ پولیسءَ پچگرگ و پدا فرنٹیر کانسٹبلری (پٹان فوج)ءِ دستا دیگ بیت۔ چیزے روچ بیتگ کہ پاکستان پیپلز پارٹی بلوچستانءِ بازین سرین باسک و مخالف لوٹ کنگا بیتگ اَنت کہ نواب اَسلم رئیسانی چہ وزیر اعلائيءِ ذمہ داریان دست بہ کشـّيت، پچیاکہ آئیءِ سرکار 3 ماہ گوزگا چہ رند ھم بلوچستانءِ توکا اِیمنی آرگا بے سوب بیتگ۔

خاص گچینین مردمانءِ کشگ بیگ (ٹارگٹ کلنگ)ءِ توکا مان بلوچستان چہ رئیسانی سرکارءِ نادینگ بیگا دیم پہ اِنگو گيئشی آتکگ۔ اِشیءِ سببا غیر بلوچانءِ نیاما سرکارءِ خلافا کنینگان سر کـَشّتگ و ھر دومی روچءَ بگندے یک نہ یک ٹولیے ٹارگٹ کلنگءِ خلافا مظاھرہ کنگا اِنت۔ اِے درگتا بی اِل اِے ھم مجبور بیتگ اَت کہ پیسرا وتی ذمہءَ زرتگین چہ دو یورشان کہ آوانءِ سببا مان کوئٹہ لھتے ھزارہ نوجوان کشگ بیتگ تنت، وتی دستا بہ کشـّيت۔ بی اِل اِےءِ بیورغ بلوچءِ اِے بیان ھم سئشبنہءَ مان بلوچستانءِ حالتاکان شنگ بیتگ اَت۔

پرندوشی وزیر اعلاءِ پاگواجھیءَ برجم داشتگین سرکاری دیوانءَ کوئٹہءَ فرنٹیر کورءِ دستا دیگءِ فیصلہ کنگ بیتگ و ھمے فیصلہءِ سرا سئشنبہءِ روچءَ إے فورس، کہ اِشیءِ سرجمین سپاھی پٹان اَنت، مان کوئٹہ پرتر مانترّا گندگ بیتگ اَنت۔ بلوچی نیوز