بلوچستان لبریشن آرمی، بلوچ رپبلکن آرمی و بلوچستان لبریشن فرنٹ جار جتگ کہ آ چہ جنگی کاران وتی دستانء دار اَنت۔ البت آوان یے جنگ بندیءِ سبب ظاھر نہ کتگ۔
بلوچستان لبریشن آرمیءِ گوانکو بیبرگ بلوچ و بلوچ رپبلکن آرمیءِ سرباز بلوچ دوشبنہ اول ستمبر حالکار سھیگ کتگ اَنت کہ آوان ھؤریءَ شئور بستگ کہ آ تنا وھدی کہ فوجی بنجاھانءِ کار دیمترا برگ مہ بنت، بلوچستانءِ توکا معدنءِ درکنگا گيئشتر سرمایہ جنگ مہ بیت و آوانءِ خلافا چاریگی کنگ مہ بیت چہ جنگ کنگا وتا دار اَنت۔
آوان گشتگ "مئے ھؤرین شئوربندی ھما کسانءِ دیما کہ فکرش کتگ ما وت مان وت ناتپاک اِنت ثابت کنت کہ آ رد بیتگ اَنت۔ مئے سئین تنظیم تپاک اَنت و مئے جھد پہ بلوچستانءِ آزادیءَ اِنت۔ بی بی سی
روچتاک توارءَ دوشنبہءَ نوابزادہ طلال بگٹی و نوابزادہ غزین مریءِ ھؤرین بیانے شنگ کتگ اَت و دوئینان لؤٹ کتگ اَت کہ نواب ذوالفقار مگسی چہ گورنریءِ عھدوا دیر کنگ بہ بیت، چیا کہ آ جنرل مشرفءِ دئورءِ مردمے اِنت۔
چہ یے بیانءِ شنگ بیگا پیئسر پاکستانءِ توکی جاورانءِ وزیر رحمان ملک گون طلال بگٹی مان کوئٹہ گندک کتگ اَت و حالکار سھیگ کتگ تنت کہ آئی گون غزین مری ھم ٹلفونءِ سرا گپ جتگ۔
راستے انگت بلوچ سلاحبندی جنگ کنؤکان وتی جنگبندیءِ سبب نہ گشتگ اَنت، بلے خیال ظاھر کنگ بیگا اِنت کہ بُرزا نبشتگین گپان گؤن جنگبندیءَ سیادییے الّما ھست اِنت۔ ھمے جنگبندیءَ بازین کس شرّین گامگيجے منـّگا اَنت و اُمید کنگ بیگا اِنت کہ آصف علی زرداریءِ صدر بیگا رند بلوچستانءِ توکا ھنچین بدلییے کئیت کہ آئی پہ لس بلوچ مھلوکءَ آسودگییے کاریت۔
ھؤریءَ امید کنگ بہ بیت کہ اگر نواب ذوالفقار مگسی چہ گورنریءَ یک کِرّ شُت گڈا چہ بلوچستانءِ مزنترین دمگ مکران یکّے آئیءِ جاگہءَ نِندارینگء بیت۔ چیاکہ پاکستانءِ تاریخءَ تنے وھدی چہ مکرانءَ نہ گورنرے زیرگ بیتگ نے کہ وزیراعلایے۔ اشی سببا مکرانءِ مردمانءِ توکا سردار و سردار پرستانءِ خلافا مارشتان ردوم زرتگ۔
.
آنگو روچتاک 'دی نیوز'ءِ ردا داکٹر مالک بلوچ چہ 'عورت فاوندیشن' نیمگا بلوچستانءِ سرا مان کراچی برجم داشتگین کنفرانسےءَ لؤٹ کتگ کہ بلوچستانءِ توکا فوجی گامگیئج رسگا دارگ بہ بیت۔ آئی گشتگ کہ بلوچستانءِ توکا چاریگی بنجاہ سیاست توکا دستمانجی کنگا اَنت تا بلوچ مان وتی سرڈگارءَ اقلیت جؤڑ کنگ بہ بنت۔ بلوچی نیوز
هیچ نظری موجود نیست:
ارسال یک نظر
وتی کلوا چێرا نبیس إت