گش اَنت وھد بدل بیتگ، موسمءَ رنگ مٹـّينتگ اَنت و زیگین پراہ و شاھگانین دنیا مرچی یک کسانین میتگےءِ درؤشما اِنت۔ 'انٹرنٹ' سرجمین دنیاءَ شنگ و تالان اِنت و راج پہ وتی رکّينگا نوکین علم و ٹلنالوجیءِ زانتکاریءَ پہ وت کنگءِ جُھدا اَنت۔ پرچا کہ مرچيگین دئورا اگر کسےءَ علم و زانتءِ نیمگا دلگؤش نہ دات و یے پڑا دیمرئی نہ کت، گڈا ھچ راہ و درے نیست کہ آ راجءَ ھستیءِ دنزانءِ چيئرا کؤر دیم بیگا بہ رکـّینیت۔ دلگؤش کرزین گپ اِش اِنت کہ مان یے 'جھانءِ فانی'ءَ بلوچ ھم یک راجےءِ درؤشما زندگ اِنت۔ وتی جُدائین رسم و دؤدانءِ ھمراھیءَ یک جدائین سرزمینےءِ واھند اِنت۔ ادا یے گپ چست بیت کہ ما چؤنکا آ دگہ راجانءِ وڑا وتا را پہ وھد و جاورانءِ دیم پہ دیمیءَ ساجو کنگا اِنت؟ بارین ما ھم علم زانت شوھاز کنگا اِنت!گندگء بیت، انّا۔ مارا گون یے وڑین سیت دیوکین کاران کار نیست۔ اَنگت ما چاکر و گوئھرامءَ یاد کن اِنت و آوانءِ مزن شانیءِ قصّوان کار اِنت۔ اَنگت گؤن تیر، تفنگ، زحم و اسپر وتی جنگان مِڑگ لؤٹ اِنت۔ ما انگت کمبرءِ اؤبادگی و گوئھرامءِ دلءِ بندیءِ سرا زندگ اِنت۔ افسور اِدا اِنت کہ مارا مدام مردمان وتی دستانءِ لئیبوک کتگ و اَنگت ھما مارا پہ وتی سیتانءِ دستا آرگا کارمرز کنگا اَنت۔
گپتءِ غلام بجار! اگر جنگا نپے بیتین اَت، گڈا رند و لاشارءِ جنگءِ داد چہ دنیاءَ مارا باز رستگ اَت۔ بلے یے سی سالءِ جنگءَ مارا بئید چہ پشومانی دگہ ھچ دستا نہ کپتگ۔
ھمے رند پدا ما ھُرد به چار اِنت، گڈا گندگ بیت کہ روسءِ دزکمکّیءَ 'بی اس او'ءِ اڈ بیگا مارا چنچوک تاوان دات۔ چنچو کسانءِ وانگ برباد بیت اَنت و مئے راجءِ تھا داکٹر، انجنیئرو سائنسدانانءِ بدلا کامریڈ جؤڑ بیت اَنت۔ قلمءِ جاگہ تفنگءَ گپت۔ پدا ھمے 'بی اس او' لھتیان پہ وتی جندءِ فایدوا ٹکّر ٹکّر کُت۔ وانگجاھانءِ توکا وانوک دگہ دگہ پارٹیانءِ توکا بھر بیت اَنت۔ ھمے پارٹی بندیءَ چنچو کسءِ ساہ گپت! ھچ کسءَ یے نیمگا دلگوش نہ دات۔ اشی بدلا لھتیان رتکگین سھرین خونانءِ چکّا وتی سیاستءِ بیرک ٹال کت اَنت و وانگجاہ سیاستءِ بنجاہ جؤڑ کت اَنت۔
بیست یکمی قرنءِ 'چئلنجان'ءِ دیم پہ دیمیءَ ما انگت ھما کوئھنین رھبندان کامرز کنگا اِنت کہ اشان ساریءَ ھم مارا نامے نہ بکشاتگ اَت۔ انگت مارا تفنگ چست کنگءِ شئور دیگء بیت۔ اشیءِ توکا مئے شاعر، قلمکار و زانتکارانءِ بلاھین دستے ھؤر اِنت۔ ھر بلوچی تاک و ماھتاکءَ چست بہ کنے بئید چہ انقلاب، تیر و تفنگ دگہ سرحالے گندگء نہ بیت۔ انقلاب وا ھست اِنت، بلے لازم نہ اِنت کہ گون تیر و تفنگ چست کنگ بہ بیت؛ آ ھم مرچیگین دئورءَ۔ اگر تفنگءَ درستین جنجالان خلاص کنگءِ توان بیتین اَت، گڈا بابا نوروز و شیرمحمد مری کہ تفنگش چست کتگ اَت و گيئشتر واک و ھمّتءِ واھند تنت، مئے جیڑہ ٹھینتگ تنت۔ آوانءِ زمانگ و ھنّوگین دئورءِ توکا زمین و آسمانءِ فرق ھست۔ مروچیگین جنگ گؤن تیر و تفنگ انّا، گؤن علم و زانت مڑگ لوٹ اَنت۔ ما وتی ڈیہءِ پدریئچ ٹکنالوجیءَ وتیگی کنگءِ شئور دیگی اَنت۔ پچیاکہ ما درست یے گپّا منّ اِنت کہ بے علم و زانت دنیاءَ ھچ راج دیمروی نہ کنت۔ پہ راجءِ دیمرویءَ ھر شھرءِ تھا وانندوین مردم پہ کار اِنت۔ مزنین عھدوانءِ سرا اشانءِ ضرورت اِنت۔
بلّی تورین ما انچوک زانین، پدا ھم وتی راجءِ بانداتءَ روشنا کنوکان دیم پہ تھاری برگا اِنت۔ آوان وانگ دربرگءِ بدلا جنگ چؤپ سوج دیگا اِنت۔ قلم کیسگءَ کنگءِ بدلا آوان تفنگ کؤپگءَ کنگ پرمایگا اِنت۔ پدا پہ جاک دنیا سرا زرتگ کہ حکومت گؤن ما نااِنصافی کنت، مئے ھَندان درین مردم کاریت مزنین کاری سیٹانءِ سرا نِندارینیت و ما بلوچ خشک و حیران اِنت! حکومت باید چؤش مہ کنت، آ ھم مئے وتی ھندان!
البت اِدا من جُست کنان کہ اگر کسے مہ زانت 'کئمسٹری' و 'فزکس'ءِ توکا کجا 'فارمولا' کارمرز بیت، 'بیالوجی' چے بلاھے، انگت 'آئی ٹی'ءِ نام آئيا نہ اِشکتگ، مہ زانت چہ 'انٹرنٹ' چے ڈولا پروگرام 'ڈان لوڈ' بَنت وھما مردم کہ وتی درستین جکاس ئی گؤن نقل پاس کتگ اَنت؛ یے وڑین مردم چے پئیم مزنین سیٹانءِ سرا نِندارینگ بیت کن اَنت؟
من چہ وتی کمکار و زانتکاران دستبندی کنان کہ اگر آ پہ دل وتی راجی ھستی، رسم و دودان رکّینگ لؤٹ اَنت، گڈا مئے آیوکین پدریئچءَ وانگ و زانگءِ سوجءَ بہ دے اَنت۔ اگر نہ مارا چه گاریءَ ھچ چيز رکّینت کت نہ کنت۔
یے نبشتانک چہ مھتاک بلوچی دسمبر 2007 زرتگ۔ اشیءِ واناکتر کنگا لھتے گال و لبزانکی ردی شر کتگ اَنت۔ بلوچی نیوز
هیچ نظری موجود نیست:
ارسال یک نظر
وتی کلوا چێرا نبیس إت