شهید مھرنھاد سرکشـّيءَ أنجمن جوانان صداءِ عدالتءِ جھدءِ گچینی حال

چدا پیئسر مھرنھادءِ وتی ویبلاگا شنگ بیتگین سیاھگ بلوچیءَ رجانک و شنگ کنگ بوت أنت۔ نین أنجمنءِ جوانان صداءِ عدالتءِ ویبلاگا شنگ بیتگین لھتے کارانءِ حال پہ شما نز آرگ و شنگ بنت تا شما شھید مھرنھاد و آئیءِ سنگتانءِ جھدانءِ باروا گيئشتر بہ زان إت۔

28 خرداد 1385 ھمدپ گون 18 جون 2006 أنجمنءِ ویبلاگا حال داتگ أت کہ 'سبز' تاکنبد چہ أنجمنءِ جوانان صداءِ عدالتءِ نیمگا شنگ بیت۔ إیشیءِ شنگ کنوک 'محیط زیست' کمیٹی إنت۔ إے کمیٹی ھر ھفتگ یک رندے أنجمنءِ کارگسا دیوان کنت۔ چہ محیط زیستءِ پلانگری زیروکان واھگ ظاھر کنگ بیتگ کہ آ دیوانان بھر زیر أنت و وتی خیالان درشان کن أنت۔ إدا إے حال ھم شنگ بوتگ کہ مھرنھاد وتی ویبلاگے پچ کتگ۔ و آئی آدرس http://mehrnehad.blogfa.com/ داتگ۔

أوَل تیر ماہ 1385 ھمدپ گون 22 جون 2006 ویبلاگا جار پرّینتگ أت کہ أنجمنءِ إنسانی حقانءِ پانک جنوکین کمیٹی ھمے زیتان وتی کارا بنا کنت۔ إے جارءِ توکا واھگ ظاھر کنگ بیتگ کہ إنسانی حقانءِ پانکجنگا واھوکین مردم ھؤر بنت۔

پنچشنبہ 29 تیر 1385 ھمدپ گون 20 جولائی 2006 ویبلاگا حال شنگ بیتگ کہ أنجمن جوانان صداءِ عدالتءِ جنینانءِ کمیٹی یک پیشداشتے برجاہ دارگا بنا کنت کہ اؤدا بَران بَرانا جنین آدمانءِ دستی کار إنٹرنٹءِ سرا إیر کنگ بنت۔ إے ردا أولی پیشداشت ھمے ویبلاگا شنگ بنت۔ جنین آدمانءِ کمیٹیءَ دستبندی کتگ أت کہ آ وتی کاران، نظران و سوجان پہ إے إرادہ سوبین کنگا راہ بہ دے أنت۔

Rights reserved by www.balochinews.com