کؤٹِک بیگءِ شکءِ سرا ننوک کشگ بوت
پاکستانءِ صوبہ سندءِ شھر لاڑکانہءِ دمگا جاہ منندین رحیم بخش مغیری نامین مردمےءَ وتی ننوکین چک کؤٹک بیگءِ شکءِ سرا گون تـَپَر گـُڈ إت و کشت۔ آئیا شک بیتگ کہ آئیءِ جنا گون یک دگہ مردمےءَ وتی دیم سیاہ کتگ۔
کشوکءِ پت رمضان مغیری پولیسءِ گورا وتی چکءِ شکایت کتگ و إیشیءِ ردا پولیسا آ دستگیر و ننوکا کشگءِ کئس آئیءِ سرا ثبت کتگ۔ رمضان مغیریءِ گشگ إنت کہ آئیءِ نشار نیکین جنینے إنت۔ بلے پدا ھم شکءِ سرا شپءِ کلاک سئےءَ رحیم بخش پاد آتکگ و ننوک گون تپر مان بستگ۔
شنگ بیتگین خبرا بی بی سی دیمترا نبیستگ کہ چہ ھمے جَنا کشوکا دو چک؛ یک بچکے و یک جنکے پیسرا ھست۔ پولیسءِ گشگ إنت کہ میاربار کندگا سارین مردمے إنت و جانا ھم ڈڈ ظاھر بیگا إنت۔ ألبت قاضیءِ دیما برگا رند إے شـَوربندگ بیت کنت کہ بارین آئیا داکٹرےءَ پیئش دارگ ضروری إنت یا نہ!
وتی گھارےءَ پیرمردےءِ گورا بھا کنگءِ میاربار دستگیر
سندءِ شھر ڈیرہ أللہ یار جاہ منندین حاجی خان نامین مردےءَ وتی تاجل نامین جوانسالین گھار 10 چکّانءِ پت و 80 سالگین إعتیار خانءِ گورا پہ صد ھزار روپیا بھا کتگ۔
روچتاک إنتخابءَ نبیستگ کہ وھدے جوانسالین جنین آدما فرصت رستگ، گڈا آئی چہ إعتیار خانءِ لوگا تتکگ و تچکا پولیسءِ گورا شتگ، و پولیسءِ دیما وتی قصہ ئی بیان کتگ۔
إیشیءِ ردا پولیسا حاجی خان و نکاح دیوکین دلاّر دستگیر کتگ أنت۔ جنین آدم پنچ صد ھزار روپیا ضمانت إیر کنوکین مردمےءِ دستا دیگ بیتگ۔ ألبت إے مردءِ نام پاشک کنگ نہ بیتگ۔
Rights reserved by www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت