بی آر إےءَ نوجوانانءِ دلسیاہ کنگءِ جوابا پولیس بندیگ کت أنت۔

ماں کوئٹہ و دگہ دمگاں بلوچ نوجواناں دلسیاہ کنگ و دگانءِ سرا؛ اُلسءِ دیما آوان بے عزت کنگءِ جوابا بلوچ رپبلکن آرمیءَ 6 پولیسانءِ ھؤریا 17 کس چکانپت و وتی بندیگ کت أنت۔

۔

بی بی سیءِ ردا ماں نصیر آباد دمگا وتی ٹرکاں ریک لڈگا گولائیشیں 11 کس لھتے موٹر سائکل سواراں شہ اودا چکانپ و گوں وت برت إنت۔ ھمے حالءِ شنگ بیگا پد پہ چکانپگ بیتگیں مردمانءِ رکـّينگا شہ 'چھتر پولیس بنجاہ'ءَ پولیساں لانکار إت۔ ألبت وھدے ماں دمگا سر بیت أنت، گڈا سلاحبندیں مردماں پولیس ھم آوار جت أنت۔

بلوچ رپبلکن آرمیءَ پولیس و آدگہ مردماں چکانپگءِ ذمہ وتی سرا زرت و گشت کہ پاکستانءِ سیمسری فوجءِ دستا بلوچاں بے عزت کنگءِ جوابا إے مردم چکـّانپگ بیتگ إنت۔ پدا بیمتراپ دات کہ أگر بلوچ استمانءِ بے إحترامی یلہ دیگ نہ بوت، گڈا سرکاری بنجاہ و کارمند تاوان دیگ إبنت۔

ھمے درگتا شہ ڈیرہ بگٹی دمگءِ لوٹی و سوئی ھنداں دو گئس پائپاں تراکینگءِ حال سر بیتگ۔ إیشانءِ سببا شہ تراکیں پائیپاں گئس رَوَگا نہ إنت۔

ترانگ بہ کپ إت کہ شہ 2004ءَ دیم پہ إنگو ماں دمگا گئس پائپ یکـّوئی تراکینگ بیگا أنت۔ إیشانءِ سببا پاکستانءَ گئس و سوچگی تیلءِ وزارتا میلیوناں ڈالر تاواں بیتگ۔

بلوچ نوجواناں بے عزت کنگءِ باروا دگہ حالجاھاں شنگ بیتگیں حالانءِ ردا سیمسری فوج آواں راہ رواجی اوشتارینگا أنت، ریش دارگ و پراھیں شلوار پادا کنگءِ سببا بے عزت کنگ بیگا أنت۔ لھتے جاھاں نوجواناں تا کلاکاں تؤل کنگا أنت۔ أگر وتی سراں چست بہ کن أنت، گڈا پہ لٹ و لگت جنگ بیگا أنت۔

بلوچ رپبلکن پارٹیءَ ھم إے کارکرد إیر جتگ۔ و گشتگ کہ ریش دارگ پیغمبرءِ سنـّت إنت و پراھیں شلوار بلوچانءِ براہ أنت۔ پمیشا بلوچ سیمسری فوجءِ واھگءِ سرا وتی ریشان نہ تراش أنت، نے کہ وتی شلواراں کسانتر کن أنت۔

Source: www.balochinews.com