عبدالحمید ریگی أنگت إیرانی حالجاھانءِ براہ إنت۔ إیرانی واک آئیا أنگت سربتگ کتگ أنت۔ إیرانی واکانءِ خیالا آ باز زانت، بلے نہ گشگا أنت۔ پمیشا تنے وھدی چاریگانءِ دستا إنت۔ دو رندا آئیا پاھوا لوپ کنگءِ جار پرّینگ بیتگ، بلے ھر دوئیں رنداں چاریگاں مارتگ کہ عبدالحمیدءِ گشتگیں گپ راز نہ بیتگ أنت؛ آ گپاں إیرانی واکاں سربتگ کتگ أنت۔ سرپدیں مردم إیرانی واکانءِ نوکتریں حالانءِ وانگا رند مار أنت کہ أول عبدالحمید ریگی تنے وھدی إیرانی واکانءِ لٹاں نہ پرؤشتگ۔ آئیا أنگت ھما زار کہ إیرانی إش زانگ لوٹ أنت و جنبش مقاومت مردمی إیرانءِ پروشگا سوب دات کن أنت؛ نہ داتگ أنت۔
چاریگانءِ مزنتریں لوٹ إیش إنت کہ عبدالمالک ریگیءِ بنجاہ کجا إنت! إیشیءِ باروا شہ عبدالحمید ریگی رستگیں راھشونیانءِ ردا لھتے ھفتگ ساریا دو جاھاں بیڑ برگ بیتگ أت۔ یکـّے إسیپت کوہ -سراوان أت و دومی جاگہ چاہ بھارءِ نزیکا أت۔ إے ھر دوئیں جاگھاں ریگی ٹولیا بازیں إیرانیاں کشگءِ جار جتگ أت و وتی مردمانءِ سلامتیءِ خبر تالان کتگ إتنت؛ أبید شہ إیش کہ ماں إسپیت کوہءِ بیڑا یکے شہ آوانءِ سرمچاراں جنگ بیتگ أت۔
ألبت چؤش ھم بیت کنت کہ إے دوئیں جاگہ چیرٹپـّگءِ جاگہ نہ بیتگ أنت، ریگیءِ مردم پہ بیڑے برگا وتا ساڑی کنگا بیتگ أنت، إیرانی واکاں شہ دگہ دراں سرپدی رستگ و اودا بیڑ إش برتگ۔ ریگیءِ جنبش مقاومت مردمی إیرانءِ وتی بیانےءَ ھمے خبر پیشداشتگ أت۔ ھر پیم بہ بیت، إیشی ثابت کنت کہ عبدالحمید ریگیءَ تنے وھدی إیرانی واکانءِ واھگ پیلو نہ کتگ أنت۔ پمیشا أنگت لٹـّانءِ آماچ إنت۔
شہ عبدالحمید ریگی إیرانیانءِ دومی جُست إیش إنت کہ جندا۔۔۔ یا جنبش مقاومت مردمی إیرانءَ کئے خرچ درچ کنگا إنت! ھنـّیگیں دئورا کہ یک چکـّےءَ رودینگ غیرمندیں پتےءِ خونا ھوشینیت؛ سرجمیں فوجےءَ گوں چُک و چوریاں لاپ دیگ، و آدگہ ضرورتانءِ کشا آواں سلاحبند کنگ مزنیں زرّے لوٹیت۔ عبدالمالک ریگیءَ وتی حال وت داتگ کہ آئیءِ مالی بستار إنچو نہ إنت!
ھمے دومی جستءِ پسّوا دیگ درگتا گِندگا عبدالحمید ریگیءَ چاریگ شہ وتی سرا ٹیلینتگ إتنت و گشتگ أت کہ أمریکائیاں آئیءِ چمانءِ کلاّ صد ھزار ڈالر عبدالمالک ریگیءَ داتگ۔ أمریکائیانءِ ناما إشکنگا إیرانیاں گلے أمب چتگ۔ نیں سرجمیں حالجاھاں أمریکا مرده باد إنت۔
إے جاورانءِ کشا عبدالمالک ریگیءِ سروکیا جنبش مقاومت مردمی إیران أنگت دیما روگا إنت۔ أنگت إیرانی واکانءِ سرا جندا۔۔۔ءِ دو دپیں زحم گوں بندیکءِ ٹالےءَ بستگ؛ ٹِلـّو إنت! پمیشا عبدالحمید ریگی أنگت لٹ ورگا إنت۔ أنگت شہ آئی جست بیگا إنت کہ عبدالمالک ریگی کجا پناہ إنت؟ آئیا جنگی کالا کئے سر کنگا إنت؟ شہ کجا و کجا راھا؟
ھر کس کہ لٹانءِ چیرا بہ بیت، راست یا رد چیزے گشیت۔ پمیشا عبدالحمید ھم وتی زیمانءِ سارینگا چیزے گشگا إنت۔ ألبت تنے وھدی آئیءِ گشتگيں گيئشتر خبر راست در نہ آتکگ أنت۔ مردمانءِ خیالا ھمیش إنت کہ عبدالحمید ریگیءَ سرجمیں راز گون نہ أنت۔
عبدالمالک ریگی شہ إیرانی واکانءِ أندازوا باز گيئشتر شیوار إنت۔ بلــّي توریں برات إنت، بلے براتا ھر رازا دیگ ھچ عقلمندی نہ إنت۔ ھمے لیکہ عبدالمالک ریگيءِ إنت۔
إے حسابا بہ چارئے عبدالحمید ریگیءِ بستار ھنی چؤش کہ خالییں وتاسےءَ إنت۔ وتاس ھمنچو نوک بہ بیت، وھدے تیر ئی مان مہ بیت، گڈا ھچ دردا نہ وارت۔
Source: www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت