"گوستگیں جمعہءِ بامگاھا ماں پاکستان دستگیر بیتگیں إحسان أرجمندیءِ آزاد کنائینگا جھد أنگت إنت۔ ماں پاکستان ناروے ھائی کمیشنءَ گوں پاکستانی 'دفتر خارجہ' رابطہ گپتگ و دفتر خارجہ إحسان أرجمندیءِ دستگیریءِ باروا پؤلکاری کنگا إنت" إے گپ أحسان أرجمندیءِ برات علی أرجمندی گوں بلوچی نیوزءِ نمایندوا کت أنت۔واجہ علی أرجمندی دیمترا درّائینت "إحسان أرجمندی بندرا مغربی بلوچستانءِ نندوکے بیتگ۔ پدا ناروےءَ پناھگیر بیتگ و ھمودی پاسپورٹےءِ واھند إنت۔ آئیا شہ ناروے پاکستانءِ ویزا گپتگ و پہ وتی سیادانءِ گندگا کراچیءِ راھا مند شتگ۔
ألبت اودا ھفتگے گوازینگا پد نادراھیانءِ سببا طبیعت ئی ناساز بیتگ۔ گڈا 6 آگستءِ بیگاھا دیم پہ کراچی راھی بیتگ۔ شہ کراچی کم گيئش 120 کیلومیٹر دیر 'اُتھل' نامیں ھندےءَ سرکاری واکداراں آئی شہ کوچا إیرگپتگ، چم إش بستگ أنت و گوں وت إش دیم پہ کراچی بُرتگ۔
واجہ علی أرجمندیءَ گيئش کت کہ إحسان لھتے نگيگیں نادراھیانءِ سببا روچے شانزدہ گولی وارت إنت۔ شکر، سرینءِ ھڈ، 'ھاپوٹائسس' و 'ھاپرٹنشن'ءِ نادراھےءِ إنت۔ پمیشا أگر آئی نگیگیں چاگردےءَ بے آرام تا دیرا دارگ بہ بیت، گڈا آئی جانا خطر إبیت۔ ھؤریا ضروری إنت کہ آئیا پہ وھد درمان بہ رس أنت۔
علی أرجمندی گشت کہ إحسانءَ ھچ ناروائیں کار نہ کتگ۔ آئی پہ وتی مردمانءِ حقانءِ دفاعا ماں ناروے مشرفءِ آیگءِ درگتا یک ظاھرییےءِ تھا بھر زرتگ۔ إے ظاھریا دگہ بازیں کساں ھم بھر زرتگ۔ ألـمّا إیشی چشیں جرمے نہ إنت کہ آئی دستگیر بہ بیت۔ پمیشا ضروری إنت کہ رسگا یلہ دیگ بہ بیت۔ تاکہ آ پہ گيئشتر دوا درمانا ناروےءَ چھر کت بہ کنت۔
إیشیا رند واجہ علی أرجمندیءَ سرجمیں بلوچ جھدکارانءِ منـّت گپ أنت کہ إحسانءِ دستگیریءِ خلافا توار إش چست کتگ۔ ھؤریا آئیا اُمید ظاھر کت کہ دریں ملکاں جاہ منندیں بلوچ ھما ھزاراں بلوچانءِ باروا ھم تـُکش أنت کہ مروچی زوراکیانءِ آماچ أنت۔
بلوچی نیوزءَ وھدے ماں إسلام آباد گوں ناروے ھائی کمیشنءَ گپ کت، گڈا سرپدی رس إت کہ إحسان أرجمندیءِ دستگیریءِ باروا آ سھیگ أنت و پہ آئیءِ رکـّینگا تچ تاچ کنگا أنت۔
بلوچستانءِ استمانی گل، بلوچستان لبریشن آرگنائزئشن، بلوچستان راجی زرمبش و بلوچ یومن رائٹس ناروےءَ وتی وتی بیانانءِ تھا إحسان أرجمندیءِ دستگیریءِ سرا دلپدردی درشان کتگ۔ و شہ پاکستانی سرکارا آئیءِ آزادیءِ لوٹ إش کتگ۔
Source: www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت