ھما کس کہ فارسی وانگا بلد أنت و مغربی بلوچستانءِ سیاسی گلانءِ چست إیراں چارگا أنت، گڈا سھیگ أنت کہ مغربی بلوچستانءِ گرمیں بحث مرچاں زرمبش إنت۔ پرچاکہ زرمبش کہ پیسرا 'بلوچستانءِ راجی زرمبش -إیران'ءِ ناما زانگ بیتگ، مرچاں بلوچستانءِ آزادیءِ لوٹا کنگا إنت۔بلوچستانءِ راجی زرمبشءِ إے لوٹ چؤش کہ مشرقی بلوچستانءِ لھتے گلانءِ حالتاکی بیانےءَ نہ أنت کہ یک لیڈرےءَ جوشا آتکگ و گشتگ۔ یا حالکارےءَ پہ ردی 'وتواجھی'ءِ گال 'آزادی' کتگ۔ إدا راجی زرمبشءِ مزنیں دیوان -کنگرہ بیتگ، لھتے روچاں بحث و چست إیر بیتگ، رندا ھمے آسرا رستگ أنت کہ بلوچستانءِ آزادی اودءِ مردمانءِ مشکلانءِ حل إنت۔
لھتے مردم بلوچستانءِ راجی زرمبشءِ إے لوٹا إیر جنگا أنت۔ إیشیا إشتاپکارییے ظاھر کنگا أنت۔ شہ سرڈگارءِ راستیاں گستا یک وابےءِ معنا ئی دیگا أنت۔ دگہ لھتے پلانگریا نبشتہ کنگا أنت۔ پلانگریا نبشتہ کنوکاں شہ لھتے کسانءِ خیال تچک نہ أنت۔ وانوکاں سربتگ کن أنت۔ مردم تچکا سرپد بیت نہ کنت کہ إے پلانگری زیروک ھمراہ أنت یا بس پہ مخالفانءِ مخالفا سیاھگ نبشتہ کنگا أنت!
ألبت من ولید گربنیءِ باور ھمیش إنت کہ راجی زرمبشءِ چست کتگیں إے گام ألــّما بلوچءِ ضرورتاں گوں ھمرد و لایق ستا إنت۔
مئے ڈولیں آزادی لوٹوکاں دیریگاں شہ زرمبش و دگہ بلوچ سیاسی گلاں دستبندی کتگ کہ بیا إت پہ وتی سرڈگارءِ آزادیا جھد کنیں، بلے آواں گشتگ کہ إیران فیلے إنت و بلوچ مور۔ فیلیں إیران گوں موریں بلوچاں إیرجیگ نہ بیت۔
شر إنت کہ مرچی مارتگ إش کہ گپ زوراک و نزورے نہ أنت۔ گپ پادمالیں مردمءِ چیھالے إنت۔ وھدے کہ یکـّےءِ پاد ماں تئی گٹا بہ بیت، گڈا تو نہ نندئے و حساب نہ جنے کہ من نزوراں و آ زوراک إنت؛ تو ھر حالتا چیھال جنئے۔
وھدے کہ ما لھتے کساں 'سازمان آزادی بخش بلوچستان کبیر'ءِ ناما 2007ءَ تچ تاچ کت، گڈا آ دگہ کسانءِ کشا لھتے زرمبشی ھم مئے ڈوبارگا گوں إتنت۔ بلے نیں ما گندگائیں کہ وت ھمے راھا آتکگ أنت۔ إیشی پہ مئے قوما یک مزنیں سوبینییے إنت۔
دستبندی إنت کہ بلوچ ھچبر إے نتیجہ گیری مہ کن أنت کہ وھدے یکـّے قومی آزادیءِ گپا جنت، بزاں تفنگ چست کنت۔ إنـّا ھچبر چؤش نہ إنت۔ ھما آزادیءِ جنز کہ سوبینیا رستگ أنت، آواں سالاں سال سیاسی پڑا ذھن سازی کتگ۔ پمیشا زرمبش بہ بیت یا سازمان آزادی بخش بلوچستان ھر دو سیاسی گل أنت و إیشانءِ کار سیاسی أنت؛ ذھن سازی إنت۔ ذھن سازی وتی مردمانءِ و دنیاءِ مردمانءِ۔
Source: www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت