أمریکاءَ بیوکیں إنسانی حقانءِ پادمالیاں إیران پاشک کنت

إیرانی پارلمنٹءِ دیما پہ منـّائینگا 20 میلین ڈالر خرچ کنگءِ یک لوٹے آرگ بوت کہ إیشی پارلمنٹا منّ إت۔ إے زر ماں أمریکا بیوکیں إنسانی حقانءِ پادمالیاں دنیاءِ دیما پاشک کنگءِ مقصدا خرچ إبنت۔

لوٹءِ سیاھگءِ ردا " إیرانءِ سرا جَتـَگیں أمریکا و دگہ مغربی واکانءِ بندشانءِ خلافا، و أمریکاءِ تھا بیتگیں إنسانی حقانءِ پادمالیاں دنیاءِ دیما پاشک کنگءِ مقصدا إیرانءِ سرکار شہ وتی أنبارا 20 میلین ڈالر خرچ کنت۔"

سرکاری 'پرئس ٹی وی'ءِ ردا پہ إیران مخالف ٹولیانءِ کمکا أمریکاءَ ھمے ھنگیاں 55 میلین ڈالر خرچ کنگءِ کار بنا کتگ۔ پمیشا إیران لوٹیت کہ أمریکاءِ ناروئیانءِ جوابا بہ دات۔

ھمے ردا بروجردی نامیں إیرانی پارلمنٹءِ باسکےءَ گشت "ضروری إنت کہ ما أمریکاءِ ناروائیں دستمانجی و آھیریانءِ خلافا بہ اوشتیں۔ ما دنیاءَ پیشدارگ لوٹیں کہ إیرانءِ پارلمنٹ پہ وتی مردمانءِ پانکجنیا لِکـّپاد اوشتاتگ۔

Source: www.balochinews.com