مروچی منی دیما یک واجھیں بلوچےءِ ترانے گوَست کہ آ گشگا أت "بھر بیگءِ عذر ھزار أنت کہ بیان کنگ إش سکّ إنت، بلے ھؤر بیگءِ عذر یکـّے إنت؛ بلوچستانءِ آزادی!"۔ إے درّیں دانگ مردما بارت؛ بلوچستانءِ سیاسی، چاگردی، دودمانی و لبزانکی جھدکارانءِ بھر بانکیءِ نیمگا سر کنت۔ھؤ أگر جھلانکیا چم شانک دیگ بہ بنت، گڈا سهرا إبیت که مدام پہ تپاکیا جھد بیتگ؛ مچّی و دیوان بیتگ أنت۔ بحث و چست إیر ھم بیتگ۔ لھتے براں تپاکیں ھؤر بند ھم ٹھتگ أنت۔ ألبت عاقبتا پدا پروشتگ أنت۔ پرچاکہ کل 'مصلحت'ءِ بنیادا بیتگ أنت؛ اُصولی و فلسفوی نہ بیت أنت۔
ھر کس زانت کہ دلپروشی شہ ھر وڑیں مارشتا بیمناکتر إنت۔ دلپروشیں مردمےءَ باز وھد لوٹیت کہ پدا وتی مارشتاں سرجم بہ کنت، رندے پدا کسےءَ باور بہ کنت و ھؤر بہ بیت یا رندگیری بہ کنت۔ پمیشا مصلحتءِ سرا ٹھینتگیں تپاکیانءِ آماچ ھچبر پہ وت نیاتکگ أنت۔
إے آماچانءِ زندگیں مثال مئے وتی ھما بلوچ جھدکار أنت کہ إیرانءِ إنقلابا رند گوں کمیونستان ھؤر بیت أنت و ماں بلوچستانءَ پرولتاری نظامءِ ولّ إش کشگ لوٹ إت۔ رندا کہ ھمے کمیونست گوں ملایاں ھؤر بیت أنت و ھما پرولتاری پرستیں بلوچ إش یک یکـّا گپت؛ جت أنت و یا درانڈیہ بیگا مجبور کت أنت۔ ھمیشاں ما گندیں کہ بادے مروچی سربتگ أنت۔
تھنکا إیش نہ أنت. مشرقی بلوچستانءَ بازیں 'غیر اُصولی' تپاکی جؤڑ بیتگ أنت و پروشتگ أنت۔ بازیں کس إش دلپروش کتگ أنت۔ دلپروشاں یا سیاست یلہ داتگ و یا غیر بلوچ دوستیں گلاں شتگ؛ ھؤر بیتگ أنت۔ پمیشا أگر بہ چارئے، گڈا مردمانءِ دیما درا بیت کہ مشرقی بلوچستانءِ مروچییں 'راڈیکل' سیاستکار گيئشتر کسانسال أنت۔ تجربہ إش 5 تا 10 سالا گيئشتر نیست إنت۔
سیاستا تجربہ سک ضروری إنت۔ تجربوانءِ برکتا مردم 'تجزیہ و تحلیلاں' قالباں إیر کت کن أنت۔ فلسفواں معنا دات کن أنت و دیمترا عملی إش کت کن أنت۔ پیمشا کوّاس گـُش أنت کہ تجربہ، فلسفہ، واھگ و واک وھدے ھؤر بیت أنت، گڈا کارکرد ثمر إدات۔
پمیشا ضروری إنت کہ تپاکیءِ واهگا دیما بروکیں جھدکار سرجمیں تکاں پہ چار أنت۔ ألــّما آپ و آس ھؤر بیت نہ کن أنت۔ ألبت آپ پہ ڈگارا و آس پہ آسجاھا ضروری إنت۔ ھمے وڑا آرتءِ تام دگر و وادءِ تام دگرے إنت، بلے دوئیں کہ ھؤر إبنت تام إش وش إبیت۔ إے ردا کئے گوں کئےءَ ھؤر بہ بیت، باید شرّی سرا چارگ و درگيجگ بہ بیت۔
بزرا داتگیں واجھیں بلوچءِ قول و آرت و وادءِ مثال پہ پھکیں جھدکاراں شرتریں راھشونی بیت کن أنت کہ إیشانءِ ردا بہ چار أنت و فیصلہ بہ کن انت۔ وھدے گپ ھؤر بیگءِ گپ إنت، گڈا پرچا ھما 'کمپونِنٹ' زیرگ مہ بیت کہ استمانا یکجاہ کن أنت۔ إدا بلــّی توریں یکـّےءِ کساس آرت و دومیءِ واد إنت، بلے پہ یکـّا دگرءِ تامدار کنگا ضروری أنت۔
Source: www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت