چمشانک: محمد زین الدینی –بلوچستانءِ راجی زرمبش
٭-تو کدی إحساس کتگ و مارتگ، په دلجمی سر پد بیتگئے کہ تئی تنظیم و گل یا دگر ھنچین جاهے کہ اودان هور کاری بنیادی رد و بند إنت؛ ذمه واری چطور گیش و گیوار بنت؟
٭-تو کدی إحساس کتگ کہ په شما مشکل إنت کے دگرانا گون وت نزیک و وتی همراه جوڑ بکنے؟
٭-تو کدی مارتگ کہ تئی فکر، خیال، رهشونی و لیکه چہ دگرانیگا شرتر و گهتر إنت، بلے أنگت آ منگ نه بنت و تو یک کر و گور کنگ بیتگئے؟
٭-تو فکر کتگ پرچا تهنکا یا گون یک کسانین مچییےءَ کار کنگ آسان تر إنت؟
٭-تو کدی فکر کتگ کہ تو چطور بکنئے تا کہ چوش مبیت؟
لهتے گش أنت کہ یک شرین گلےءِ لیڈر، سروک یا مستر گون وتی کاریسمئین فکر و لیکهان همگرنچ إنت. مطلب إیش إنت کہ یک شرین لیڈر و مسترے همیشه شرین فکر، لیکه و ویژن در گیجیت.
باز کس فکر کن أنت کہ إیوکا شرین فکر و ویژن مان یک تنظیمےءَ درستیگین دیمرئیانءِ بنرد أنت. ألبت باز گش أنت چوش گشگ چہ ذمه داریان تچگ إنت. باز چوشین فکرا 'میت' گش أنت. لهتے چوش فکر کن أنت کے گون یک شرین فکر و ویژنےءَ یا گون یک تحلیل درستگین کار جوڑ و مشکل حل إبنت. بلے مان ھما گل و تنظیمان یا دگہ هنچین مچی کہ اودا دگرانی رضا، همراهی، کمک و هور کاری دیمرئیءِ بنرد إنت؛ صرف شرین فکر و ویژن کافی نه أنت.
وهدے کہ نوکین فکر و ویژن دیما کاینت، أگر پجّارگ بہ بنت، پہ وتی جاہءِ درگیجگا آیاں ضروری چانس و مهلتءِ رسگ پکار إنت. بلی تورین آ په گل یا تنظیمءَ هداروکی نگیگی کار أنت، بلے په فکر و ویژنءِ ردوم دیگا همے رهبند جوان إنت. پرچاکه إے دروشمین فکر و ویژن چدا پیسر رشت کنگءِ مهلت دیگ نه بیتگ أنت تانکه جهدءِ دراجین سفرءِ طےکنگا په گوئم هور بیت به کن أنت. یک سیاسی گل یا تنظیمءِ گوانکو إیوکا آئیءِ مستر و کماش مبنت, بلکه نوکین فکرءِ واهند هم وتی چپ چاگرد و وتی مخالفان هم شری سرا پجاہ یارگ و سر پد بیگءِ موه دیگ به بیت. تهنکا شرین قکر و لیکه إے دراجین سفرا گونڈ کت نه کن أنت.
جست إیش إنت کہ إے جوانین فکر چطور عملءِ تها (into action ) آرگ به بنت؟
سر وتیں پسوے دیگ ساده إنت. بلے بدلیءِ آرگ مشکل و أڑانک إنت. مردم گوں وتیگ و دگران چون تران بہ کنت، گندنند چون بہ کنت، وتی کارانءِ بروردا چونکا بہ چکـّاسیت، چطور تنظیم و گلی رسم و ربیدگان په مقصد جوڑ کنت؛ إے مشکل أنت. همے مشکلان گواز کنگء شرتریں راہ ھما وھدی دستا کپیت کہ کامیابیء دروشما عملء برورد ودی بہ بیت. نوکین فکران جاہ دیوکیں کماش، مستر و سیاستمدارانء مزنیں بھرے کامیاب نہ بیت۔ ألبت کامیاب و ناکامیا سرکچ وروک سیاسی ھنرمند و ھژارین مردم أنت۔ یک ماهر و دنیا دیستگین سروکے صرف شرین فکر و ویژن در نگیجیت، بلکہ چپ چاگردا هم پجا کاریت و خبرا په عمل سر کنت.
خبرا په عمل سر کنگ طاقت لوٹیت. طاقتءِ دروشم مختلف أنت. سیاسی طاقتءِ کامیابی ھما أنت کہ دگرانا ھما راھا سر بہ کنت کہ چدا پیسر آیانءِ رضا و دلکشا نہ بیتگ۔ ھمے کامیابیءِ جھدا زحم و تفنگءِ زور گوں مہ بیت۔
ألـمّا پہ وتی کامیاب کنگا باز کس وتی مالی واکا، باز کس وتی 'اوتوریتی'ءَ و لھتے وتی زانتا کارمرز کن أنت۔ تاریخءَ باز جاگہءَ مردم گندیت کہ طاقت وریں لیڈر یا کماش فئیل بیتگ أنت۔ إیشانءِ فیل بیگءِ سبب گيئشتریں وھدا آیانءِ طاقتءِ کمی نہ بیتگ، بلکہ سیاسی ھنر و ھژاریءِ نزوری بیتگ۔ طاقت مردما کسانین مقصدان سر کنت، بلے دراجین راہ، مزنین پڑ و أڑانکین مقصدان مردما مزنین مشکل و جنجالاں مانگیشیت، و فئیل کنت.
ھر جھلیں گپءِ عملی بیگ یک شاھگانیں سیاسی لیکہ و ویژنےءِ برورد بیت کنت. إے وڑ و آ پیم کنگءِ سوجا دیگ سادہ إنت۔ پہ ھمیشان یک عمل بیگی راھےدرگیجگ و ماں یک میزے سرا آرگ مشکل إنت۔ ھمد إنت که مردما وتی إتحادی، بزان ھما کہ هم مقصد أنت و سیت یا نف إش یک أنت؛ پجاه آرگ و سر پد بیگ لوٹ أنت. گوں إے وڑیں واکاں پہ دے و گرا ترا ساڑی بیگ پکار إنت تانکہ مردم ھؤردست بیت بہ کنت۔ ھؤری جوڑ کنگ و ھمے ھؤریاں ترا کماشی کنگءِ واک بیگ لوٹیت۔
سیاسی هنر و کرد یک ھنچیں طاقت و وسیلھےءِ إنت کہ چے کنگ و چے نہ کنگءِ راھاں شون دات۔ ھمیشانءِ کنترولا مردمءَ دستا دات۔ سیاسی علمءِ سلاحبند زانت کہ آئیءِ ھم لیکہ و مخالفت کنوک کئے أنت۔ و کجا وھدی گوں کےءَ چے وڑا دیم پہ دیم بہ بیت۔ أگر یک کامیابین سیاسی سروک و کماشے جست کنگ بہ بیت که وتی گپا عملی کنگءِ راھا آ چطور کامیاب بیتگ، گڈا ضرور پسه دات که آئیا مختلفین فکر و خیال یک جاه کتگ أنت، گوں آواں هورکاری ئی کتگ، ھوریا پروگرام إش ٹھینتگ و ھمیشانءِ مستری و کماشی کتگ.
وتی و دگرانءِ فایدیاں سرپد بیگءِ نام سیاست إنت. ھما راہ و رھبنداں در بہ گیج کہ ترا و دگران همگرنچ کن أنت و فائده دی أنت. دگران بیارئے و وتی همراه جوڑ بہ کن و آیانی مستری و کماشیا بکن.
mohammadzainudini@gmail.com
هیچ نظری موجود نیست:
ارسال یک نظر
وتی کلوا چێرا نبیس إت