پدا ھما بیت کہ پیسرا باز براں بیتگ۔ چمشانک: ولید گربنی

عبدالمالک ریگی دستگیر بیت۔ مرچی یا باندات إیشی بیگی أت۔ أگر دستگیر إش مہ کتین أت، گڈا ألـّما کشتگ إتش۔ پرچاکہ گوں پیسری سلاحبندیں جھدکاراں ھمے وڑا بیتگ۔

میردوست محمد خان إش تھران لوٹائینتگ کہ گوں آئی مزاکرات بہ کن أنت، ھمودا کشت إش۔ پہ دادشاہءِ توار کنگا بلوچ حاکم إش راہ دات أنت، توار إش کت و پدا کشت إش۔ رحیم زردکوھی چیرکائی پھرہ پُترت و ھمودا چاریگاں کوشارینت۔ زردکوھیءِ دومی برات؛ بیبگر زردکوھی رندترا ماں وتی میتگا جنگ بیت۔

رسول بحش و أمان اللہ مبارکی إش گوں دگہ سریں بلوچاں میڑینت أنت و مخالف إش مجبور کت أنت کہ إیشانءِ رازاں پاشک بہ کن أنت۔ ھمے وڑا دستا کپت أنت و پاکستانی پولیسا کشت أنت۔ مولک نامین مردے دراتک و گجرئی دلسیاہ کت أنت۔ آخرسرا آئی إش ھم جت۔ ھمے وڑیں دگہ مثال بازین أنت۔

إیران بہ بیت یا پاکستان ھردوئیں ملک سرساریں بلوچانءِ أجل أنت۔ پہ سر چست کنگا نہ إلّ أنتش۔ سیاسیاں دستگیر بندیگ کن أنت و سلاحبندیں جھدکاران کش أنت، خلاص کن أنت، ندکار و دودمانیاں شہ واریا سید ھاشمی و کمال خان ھوتءِ وڑا زیت مرگ کن أنت۔ یا گلخان نصیر وڑا فوجی دادانءِ چمدار کن أنت۔

عبدالمالک ریگیءِ دستا کپگا وا مردم أبکـّه کتگ أنت کہ چونکا إنچوکیں کوّاسیں جنگول زندگا إیرانءِ دستا کپت؟ یا إیش کہ ھنچؤشیں گرابےءَ سوار 'شہ دبئی إیرانءِ خاکءِ سرا بال کنانا گوزیت'؟ إے لھتے سادویں جست أنت کہ سرحالانءِ وانگا پد دلا کا أنت۔

جُھل بُنیں حالانءِ وانگ و گوشدارگا پد سرپدی رسیت کہ عبدالمالک ریگی ھچ گرابےءَ نہ بیتگ۔ آئی شہ پاکستان دستگیر و إیرانءِ گورا بھا کنگ بیتگ۔ إے سوداءَ أمریکائی چاریگ و أفغانستانءِ لاپ پرستیں طالب گوں بیتگ أنت۔ ماں ھلمند دمگا بیوکیں ناٹو فوجی آپرئشنءِ درگتا إیرانءِ کتگیں کمکانءِ منتواریءِ حسابا عبدالمالک ریگیءِ دستا دیگا أمریکاءِ رضایت هؤر ترّتگ۔

'سیاستا نہ کسے مدامی دوست و نہ کسے مدامی دشمن إنت'. ألبت بلوچ مرچییں دھرا پہ پاکستان یک قیمتی جوھرے أنت۔ خاص ھنـّی کہ أمریکا و إیران پہ إیشانءِ خرید کنگا اوشتاتگ أنت۔

بدقسمتی ھمیش إنت کہ بلوچ وتی قیمتا وت نہ زانت۔ پمیشا برے پاکستانءِ سیاسی گل چؤش کہ پی پی پی آئیا کارمرز کنت؛ رندا چگل ئی دات۔ دئومی برا خالد شیخ و رمزی یوسفءِ وڑا ملایانءِ آلہء کار بیت کہ آئیا پاکستانی چاریگ کارمز و پدا بھا بہ کن أنت۔

پاکستان و إیران وتیگاں بھا نہ کن أنت۔ رد مہ ور إت، عاطفہ صدیقی نامیینے کہ أمریکائیاں زرتگ، بُندرا یک بلوچےءِ جن بیتگ۔ آئی خالد شیخءِ برات جن بیتگ۔ ھما برات کہ گوں خالد شیخ ھوریا أمریکاءِ گورا پاکستانیاں بھا کتگ۔

پہ بلوچاں ساریا ضروری بیتگ، هنون ضروری إنت و دیمترا ضرورت إنت کہ جزباتی جھدءِ جامگا در بہ کن أنت۔ مذھبءِ بازیں ٹیکہ دار ماں مکـّہ، ألاضھر، قم و رائے وند نشتگ أنت۔ بلوچ شہ آواں پھتہ تر نہ أنت۔ پرچا بلوچ دستبوگ بہ بنت و یکـّوئی زوال بیان بہ بنت؟

إسلام بہ بیت، پاکستانءِ فوجی دکٹاٹوری بہ بیت و إیرانءِ خونواریں سی سالی رواج؛ بلوچ پرچا پہ إیشانءِ دیر کنگا مزنتریں سلاح بہ بیت؟ زاناں بلوچءِ جندا کموک جیڑہ ھست إنت کہ دگرانءِ جنجٹاں وتی بڈ ّا بہ کنت؟

پرچا بلوچ وتی وھدا و واکا په وتی چاگردءِ ڈاہ دیگا مہ گوازینیت؟ وانگ ھیل بہ دات و ھیل بہ کنت، لبزانکی پڑا، دوا درمانءِ تکا، دودمانی پدمنتگیانءِ خلافا سیاسی تپاکیءِ پڑا کارکنگا پرچا وتی وس و واکا خرچ نہ کنت؟

پرچا ریگی درؤشما 'إیرانءِ مردمانءِ مزاحمت/ مقاومت'ءِ سروکیا بلوچ بہ کنت، خدائی فوج به بیت و بلوچاں ھمے راھا ندر بہ کنت؟

نیں وھد إنت کہ بلوچ وتی چمّاں پچ بہ کنت۔ أگر نہ پَشتکپتگیں جھدکار چؤش کہ میر براھمدغ بگٹی، أللہ نظر و دگرانءِ عاقبت (بے بلاہ) ھنچؤش بیت کنت۔ أگر صدا صد ھنچؤش مہ بیت، ألبت أمریکاءِ ڈرون میزائلے مدامی وڑا رد وارت کنت و قول بلوچدوستیں أمریکائی حالکار 'ونڈی جانسن' پدا ھما "ھٹـّرے۔۔۔۔۔! میزائل ردیا آنگو شت"ءِ قصہ تازہ کنگ بی أنت۔

بلوچی نیوز داٹ کام