مشکلیں فیصلواں کنگ آسان نہ انت: بلوچی نیوز

مرچی مشرقی بلوچستانءَ ھزاراں ھزار بلوچ گوں دلسیاھیاں دیم پہ دیم انت۔ پاکستانءِ فوجی یورش و بے حسابا گچینی سیاسی جھدکاراں دستگیر کنگ، چیریں جاگھاں برگ، آواں لٹ کٹ کنگا پد کشگ و جسداں تلپیں جاگھاں یلہ دیگءِ حیوانی کارکرداں بازیں کٹم غمانی آساں دئور داتگ انت۔ دگہ بازیں کٹم دستگیریں سیاسی جھدکارانی رکـّینگا صحب تا بیگاہ پاکستانی و درملکی انسانی حقانءِ پانکجنیں بنجاھانی دیما پریات زاری کنگا انت۔ لھتے دگہ ھر روچی جنگ جدلانی آماچ شہ وتی نایاپتیں زندگیاں زبھر بیگا انت۔ اے پھکانی کشا مرچی سیلابا ھزاراں ھزار کٹم درپدر کتگ انت۔ اے وڑیں وھداں پہ سیاسی و چاگردی جھدکاراں فیصلہ کنگ مشکل انت کہ آ وتی دلگوشا کجا نیمگا بہ ترّین انت۔

پدا ھم اے وھدی شہ ھر چیزا گيئشتر سیلابءِ سببا آتکگیں تباھیءِ آماچاں کمک کنگ ضروریتر مارگ بیگا انت۔ پمیشا سیاسی، چاگردی و وانندہ گلانی ذمواری انت کہ آ اے تکا لانکاں بہ بند انت و پہ وتی قومءِ دلسیاھیں مردمانی کمکا جاہ بہ جن انت۔ سیلابءِ آماچاں ھر روچی ضروری چیز چؤش وراک، گد و ساھگے رسینگ باید ھر بلوچدوستیں گلءِ اولی ذمواری بہ بیت۔ پرچاکہ شدیگ و درپدریں قوم وتی سیاسی حقاں پھاز ات نہ کنت۔ پہ نادراھاں دوا درمان سر کنگ۔ پہ شدیگاں وراک رسینگ و پہ بے لوگاں خیمہ جنگ سک ضروری انت۔ چشیں وھدا اگر بلوچدوستیں گلانی مردم ظاھر مہ بنت، گڈا بلوچ عوام وتی غموارانی جاہ آرگا رد وارت کنت۔ آ وتی کشا وھدی ایوکا پاکستانی فوج و ملا تنظیماں گند انت، ھمے مار انت کہ غموار اش ھمیش انت۔