کردستانءِ آزادیءِ جیڑہ ٹھینگ بہ بیت: روسءِ دموکراٹ پارٹیءِ سروک

روسءِ دموکراٹ پارٹیءِ سروک ولادیمیر ژیرینوفسکیءَ شہ امریکا، یورپی اتحاد و ناٹوءِ باسکاں لوٹ کتگ کہ کردستانءَ بیوکیں کوشت کؤشءِ دیما دارگءِ مقصدا اودءِ آزادیءِ جیڑوا بہ ٹھین اَنت۔ اے خبرا کہ آئیءِ گلءِ ویبسایٹا شنگ بیتگ سرکچ داتگ کہ کردستانءِ آزادی مڈل ایسٹءِ منزتریں جیڑہ اِنت و اگر ٹھینگ مہ بیت، اودءِ مشکلاں گیشتر کنت۔

ولادیمیر ژیرینوفسکیءِ بیانا داتگ: میانملکی کنوینشنانی خلافا کوسوو یک ملکے منّگ بوت، بلہ کردانی جیڑہ ڈالچار کنگ بیگا اِنت۔ دھاں سال اِنت کہ کرد استمان ترکیءِ آسیں بمب و توپانی دیمپان اِنت و بے حسابا کشگ بیگا اَنت، بلہ کسے نیست اِنت کہ آوانی پلانگریا پاد بہ یئت۔

آئیا دیمترا گشتگ: ھنوں کہ ایران و ترکی سلاحبندیں کردانی خلافا ھمشور اَنت، امریکا و یورپ چشیں وھدےءَ کردانی انسانی حقانی پھازگا چست بہ بی اَنت۔

یک کاگدے لبرال دموکراٹ پارٹیءِ اے سروکا باراک اوباما و دگہ سریں مردمانی سرا راہ داتگ۔ کاگدا نبیسگ بیتگ: کردانی مردمی حساب 40 ملیون اِنت و بے آزاد ملکیں مزنتریں قوم اِنت۔ کرد ترکی، ایران و عراقءِ نیاما بھر اَنت۔ بازیں سال اِنت کہ آ پہ وتی آزادیا جھدا اَنت۔ ناٹوءِ واک امن و انصافءِ ناما دنیاءِ بازیں ملکاں راہ دیگ بیتگ اَنت، بلہ کردانی جیڑوا کِمار نہ کنگا اَنت و کارے کنگا ما کسے نہ دیستگ۔

حال زرمبشءِ منّتا