جرمنیءِ سٹلائٹے زمینءَ کپتگ، بلہ کس نہ زانت کجا

جرمنیءِ سٹلائٹے کہ پہ سائنسی پولکاریا آسمانءَ بیتگ، عمرءِ خلاص بیگا رند زمینءَ کپتگ، بلہ کس نہ زانت کجا ھندا۔ دیم پہ زمینءَ کپگءِ درگتا سٹلائٹءِ مزنے بھرےءَ وا سُچگی بیتگ، البت آئیءِ 30 ٹکر کہ کساس 1.87 ٹن وزن اِنتش، باید زمینءَ بہ کپتین اَنت۔

جرمنیءِ ایرو سپیس بنجلءِ سروکا گشت کہ دلجمیں حالے وا نیست اِنت، بلہ ھنچوش ودی اِنت کہ مردمی آبادیےءِ سرا نہ کپتگ اَنت۔ آئیا دیمترا گشت: باز روچاں رند بلکیں مارا سرپدی بہ رسیت کہ اے سٹلائٹءِ ٹکّر کجا ھندا کپتگ اَنت۔

امبری ستمبرءَ ناساءِ شش ٹنی مرتگیں سٹلائٹے ماں آرام شہ زرا کپتگ ات۔ آئیءِ کپَگا ساری سائِنسداناں ترس ات کہ مردمی آبادیےءِ سرا کپیت۔