اسلامی موبایل ٹلیفونے جوڑ کنگ بوت

ڈپریشن ھنوگیں دورءِ مزنتریں نادراھی اِنت

ھنوگیں زمانگءِ مزنتریں نادراھی ڈپریشن بزاں نفسیاتی نادراھی اِنت۔ اے نادراھی شہ کارا موکل زیرگا گوں وش نہ بیت، انگت گیشتر بیت۔ جرمنیءِ کوّاسیں نفسیاتی داکٹر الرش اگلرءِ ردا ھمُک روچی کارا یلہ دیگ و ترتابا روگ شہ اے ناوشیا درکپَگءِ درمان نہ اِنت۔ چوش کنگا انگت مردم گیشتر ناوش بیت۔ نام گپتگیں داکٹرءِ ردا ڈپریشنءِ آماچیں مردم ھنچوش مار اَنت کہ سک دم اش برتگ و تُستگیں مار انت۔ آوانی گمانا اگر الکاپیا بہ وپس اَنت، گڈا وشیں روچے گوازینت کن انت۔ وش نیوز

انٹرنٹءِ سرا راز دوزگا چین و روس شہ دگہ ملکاں دیماتر اَنت: امریکا

سائبر چاریگ پہ امریکاءِ معیشت و دیمپانیءَ مزنتریں تُرس جوڑ بیان اَنت، امریکاءِ دیمپانی چاریگ بنجاھا کانگریسءِ سرا دیم داتگیں وتی رپورٹےءَ اے گپ پدّر کت۔ رپورٹا روس و چینءِ سرا میار لڈگ بیتگ کہ آ انٹرنٹءِ سرا کار زوالیاں گولائیش اَنت۔

دَھاں بیلین ڈالرءِ کارباری، ٹکنالوجی و شھزانتی پولکاریانی راز ھمک سال شہ امریکاءِ سرکاری بُنجاہ، کارپوریشن و پولکاری بنجلانی کمپیوٹراں دوزی بیگا اَنت، دیمپانی چاریگ کارگسءِ سروکا گشت۔ دیمپانی چاریگ کارگسءِ کار امریکاءِ خلافا کارزوالیاں چارگ اِنت۔

ھشت ھزار کلومیٹر دوریں نشانءَ جنوکیں روسی میزائلے چکّاسگ بوت

روسءَ بین البراعظمی میزائلےءِ تجربہ کتگ۔ میزائل8 ھزار کلومیٹر دور وتی ٹارگٹا نشانگ جوڑ کنگ ءُ جوھری سلاح برگءِ واکءِ واھند اِنت۔ روس ءِ دیمپانیءِ وزارتءَ گشتگ کہ 37 ٹن گرانیں بین البراعظمی میزائل بحیرہ ابیضءَ چہ یک آبدوزےءَ تجربہ کنگ بوتگ۔ میزائلءَ 6 ھزار کلو میٹر دور زروانےءَ وتی ٹارگٹ سوبمندیءَ نشانگ جوڑ کتگ۔ وش نیوز

نوکیاءَ نوکیں موبایل فونءِ دیمدرائی کت

نوکیا لومیا 800

گوں نوکیں موبایل ٹلیفونےءِ دیمدرائی کنگا نوکیاءِ سروکا گشت پہ کمپنیا نوکیں روچےءَ ٹک کتگ۔ دیمدرائی کنگ بیتگیں ”لومیا 710 و 800 دنیا تھا وینڈوزءِ شرتریں فون اَنت“ اسٹیفن ایلوپ گشت۔ نوکتریں ماڈلءِ دیمدرائیءِ کشا چار دگہ ماڈل شون دیگ بیت اَنت کہ نوکیاءِ پیسری مشین ‘Symbian’ءِ سرا کار کن اَنت۔ اے ٹلفونانی لڑ ھِندی گال ‘آشا‘ بزاں امید نام دیگ بیتگ۔ نوکیاءَ امید اِنت کہ نوکتریں ٹلیفونانی کمکا آئی وتی باھینتگیں مقاما پدا دست گریت۔ لومیا ماڈل شہ نومبرءَ برطانیاءِ بازاراں زیرگ بیت کن اَنت۔ ٹلیگراف

جرمنیءِ سٹلائٹے زمینءَ کپتگ، بلہ کس نہ زانت کجا

جرمنیءِ سٹلائٹے کہ پہ سائنسی پولکاریا آسمانءَ بیتگ، عمرءِ خلاص بیگا رند زمینءَ کپتگ، بلہ کس نہ زانت کجا ھندا۔ دیم پہ زمینءَ کپگءِ درگتا سٹلائٹءِ مزنے بھرےءَ وا سُچگی بیتگ، البت آئیءِ 30 ٹکر کہ کساس 1.87 ٹن وزن اِنتش، باید زمینءَ بہ کپتین اَنت۔

برق أڈ کنوکیں مادن

پند رئوکانءِ یک ھنچیں راھے ماں فرانس چکـّاسگ بیگا إنت کہ برق أڈ کنت۔ شہ إیشیءِ سرا گوئزوکانءِ برکتا 30 واٹ برق دستگرگ بیت کنت۔ إے برق سربُرا روکیں چراغاں بس بیت إنت۔

راہءِ پٹیءِ چیرا 'مائکرو سنسر' وڑےءَ نادینگ بیتگ أنت کہ سربرا إیر بیتگیں پادانءِ توانائیا زیر أنت و بئٹری تھا سرجم کن أنت۔ پدا ھمے بئٹریءِ توانائی چراغان روک کنت۔ روچتاک 'ڈان'‏ءِ منـّتا

ٹویوٹاءِ ناما مفتا بدنام کنوکیں ڈرائور جست پرس بیگا إنت

ماں أمریکا یک ٹویوٹا گاڑییےءَ سواریں 'جمز سائکس' نامیں مردےءَ پولیس جست پرس کنگا إنت۔ پرچاکہ پولیسا شک إنت کہ إے مردا پہ دروغ گشتگ کہ سواریں ٹویوٹا گاڑیءِ 'أکسلریٹر' مانگیشتک۔ پمیشا گاڑی 130 کیلومیٹرءَ شہ أنگت تیزتر روگا بیتگ۔

ھمے گاڑیءِ دیما پولیسا وتی گاڑی داتگ أت و گوں ھمائیءِ زورا اوشتارینتگ أت۔ کوّاساں پرّیں دو روچ گاڑی چارتگ و چکـّاستگ، بلے ھچ ردی ودی نہ بیتگ۔ پمیشا پولیس جمز سائکسءَ دروغبندیءِ شکـّا جست پرس کنگا إنت۔

مشرقی و مغربی بلوچستانءِ 18 بندینانءِ نام

شہ مغربءَ دیم پہ مشرق بلوچستانءِ نامییں بندنانءِ نام چیرا داتگ أنت۔ إیشاں أبید بلوچستانءِ زربارا بازیں کسانیں میتگ هست أنت اودءِ مردم گوں ماهیءِ گرگا وتی زنداں گوازین أنت۔

مغربی بلوچستان:
میناب، جاسک، کنارک، تیس، چاہ بھار، کوک سر، بریس، گواتر

مشرقی بلوچستان:
جیونی، پیشوکان، گنز، سُر، گوادر، پسنی، اورماڑہ، لیاری، سونمیانی، گڈانی

Rights reserved by www.balochinews.com

تا دیئرا آپءِ توکا زندگ بیوکیں برنجے أڈ کنگ بوت

أمریکائی سائنسداناں آپءِ توکا رُدوکیں برنجی کاھےءِ جیں 'پرئسشن بریڈینگ' نامیں راھبندےءَ گوں برنجا ھؤر ترّینتگ و 'سوارنا' نامیں نوکیں برنجے أڈ کتگ کہ تا دیرا آپءِ توکا زندگ مانیت۔ پیسری برنجانءِ کشار أگر تا سئے روچا آپءِ چیرا بہ بنت، گڈا مر أنت۔

ھندوستان و بنگلادیشءَ 100 کشارکاراں إے برنجگ دیگ بیتگ و کشگا رند سرپدی رستگ کہ سیلابانءِ درگتا آواں أچ پیسرا پنچ ھمنچو ثمر رستگ۔

میاں اُستمانی پٹاسکاری بنجاھا إے نوکیں برنجا أڈ کنوکیں 'پاملا رونالڈ' نامیں سائنسدانا گشت "ما گوں کشارکاراں دپ کپتگیں و أچ آواں جست کتگ کہ نوکیں برنجا آوانءِ زندا چے شرتری آرتگ، گڈا گشتگ أش کہ وتی لاپا درگيجگءِ کشا آواں گيئشیں برنج رستگ کہ بھا إش کتگ أنت"۔ صداءِ أمریکا

Rights reserved by www.balochinews.com

أمریکائی جنینےءَ 14 چک بے پتےءَ آرتگ

أمریکاءِ شھر لاس أنجلیسءَ داکٹرےءَ یک جنیں آدمے کمک کتگ تا آ 14 چک بے پتےءَ بیاریت۔ سرکار پٹ پُلا إنت، تاکہ بہ چاریت باریں داکٹرءِ خلافا کئسے ثبت بیت کنت یا نہ۔

کلیفورنیاءِ دوادرمانی بنجاہ -مئڈیکل بورڈ' ءِ داتگیں حالءِ ردا داکٹرءِ کمکا 33 سالگیں نادیا سلیمانءَ 14 چک چہ وتی یک پجاہ آروکےءِ تخما بے ھؤریں وپتوابا آرتگ أنت۔ أچ إے 14 چکـّاں 8 گوستگین ماہءِ 26ءَ یکپارگی ودی بیتگ أنت۔

سرکاری میڈیکل بورڈءِ خبرا پیسر سروزامیں 'نادیا سلیمان' ٹلوژنءِ دیما پاشک کتگ کہ یک داکٹرےءِ 'آئی وی اف' علاجءِ برکتا چاردھیں چک براں برانا آئیءِ لاپا کپتگ أنت۔

آئی وی أف علاجءِ راھبندا جنین آدمءِ ھئیک چہ 'اوری'ءَ زیرگ إبنت و پدا چہ جنینءِ لاپا ڈن یک کسانیں شیشگےءِ توکا گوں مردیں آدمءِ تخما ھؤر کنگ إبنت۔ چیزے روچءِ توکا إیش رُشت کنگا بنا کن أنت۔ چہ إیشی رند گوں سیچن جنیں آدمءِ چکدانا راہ دیگ إبنت۔ چیرا داتگیں عکسا بہ چار إت۔

داکٹری قانونءِ ردا جنین آدمےءِ چشیں علاجا کنگا پیسر باید چارگ بہ بیت کہ باریں چک یا چکـّانءِ ودی بیگا رند آواں چارگ وارگ و رشت ردومءِ جوازت مات و پتا ھست إنت یا نہ۔ ھنچوناھیں جاوراں گون یک جنیں آدمےءَ 14 چکـّاں ألکاپیا رودینگ ممکن نہ إنت۔ پمیشا میڈیکل بورڈ داکٹرءِ خلافا قانونی گامگیج زیرگا إنت۔

Rights reserved by www.balochinews.com

نوکین موبائل فونان کارمرز کنگ گران إنت

نوکین موبائل فونان کارمرز کنگءِ گرانین راھنبدانءِ سببا آوان کامرز کنوک دلسیاہ أنت۔

برطانیا و أمریکاءَ نندوکین مردم کہ إے باروا جست کنگ بوتگ أنت، آوانءِ نیاما 61٪ مردمان گشتگ کہ نوکین موبائل فونانءِ کارمرزیا ھیئل کنگءِ مشکل مردما توسین أنت۔

ألبت پدا ھم جست کتگینانءِ نیاما 95٪ مردمان گشتگ کہ أگر فونان کار مرز کنگ آسودگتر بہ بیت، گڈا آ نوک داتگین سھولتان کارمرز کنگا واھوک إبنت۔

نوکین فون باز مختلفین کار کت کن أنت، بلے گيئشتر مردم أنگت إیشان یوکا پہ ٹلفون جنگا کارمرز کنگا أنت۔ بی بی سی

Rights reserved by www.balochinews.com