سائبر چاریگ پہ امریکاءِ معیشت و دیمپانیءَ مزنتریں تُرس جوڑ بیان اَنت، امریکاءِ دیمپانی چاریگ بنجاھا کانگریسءِ سرا دیم داتگیں وتی رپورٹےءَ اے گپ پدّر کت۔ رپورٹا روس و چینءِ سرا میار لڈگ بیتگ کہ آ انٹرنٹءِ سرا کار زوالیاں گولائیش اَنت۔
دَھاں بیلین ڈالرءِ کارباری، ٹکنالوجی و شھزانتی پولکاریانی راز ھمک سال شہ امریکاءِ سرکاری بُنجاہ، کارپوریشن و پولکاری بنجلانی کمپیوٹراں دوزی بیگا اَنت، دیمپانی چاریگ کارگسءِ سروکا گشت۔ دیمپانی چاریگ کارگسءِ کار امریکاءِ خلافا کارزوالیاں چارگ اِنت۔
ھنوں کہ امریکاءِ وتی معیشت نگیگیانی آماچ اِنت، سرپدیانی دوزی بیگءِ کارکرداں اِدءِ واکدار مجبور کتگ اَنت کہ پہ وتی معیشتی سیتاں انٹرنٹءِ راھا راز دوزوکیں ملکاں پاشک بہ کن اَنت۔ چوناھا ھَکر شہ بازیں ملکاں اَنت و ایشانی نیاما درملکی چاریگاں بہ گر تانکہ کارباری مجرم ھوار اَنت۔ البت، امریکاءَ گیشتر شہ چین و روسءَ ترسیت۔
”شہ پھکاں سرگرم و سک سرتریں معیشتی دوز چینءَ اَنت۔ درملکی چاریگ انٹرنٹءِ راھا امریکاءِ معیشتی رازاں دوزگا اَنت“ سنیٹا دیم داتگیں رپورٹا گشگ بیتگ۔ ھمے رپورٹ امریکاءِ 14 چاریگی بنجاھاں سرجم کتگ۔ ایشیءِ تھا گیش کنگ بیتگ ”روسی چاریگ وڑ وڑیں تکاں گولائیش اَنت تانکہ شہ امریکاءَ معیشتی سرپدی و ٹکنالوجی در بہ گیج اَنت۔“
چینی سفارتءِ گوانکوا امریکاءِ درشان کتگیں گپ رد گشت اَنت و گیش کت ”چین انٹرنٹءِ سرا شہ قانونا دریں سرجمیں دستگٹیاں ایر جنت۔“ سال 2009ءَ چینءِ کمپیوٹر دیمپانیءِ کوّاسانی نیاما صدا 89 کساں بیم درشان کتگ ات کہ امریکا آوانی رازاں دوزیت۔ اے پڑا امریکاءَ ھمے گشت کہ آوانی سرکار چشیں کارانی رندا نہ رئوت۔
وھدے اے ردا گوں روسءِ سفارتا رابطہ گرگ بوت، گڈا آ گپے جنگا واھوک نہ اتنت۔ واشنگٹن پوسٹ
هیچ نظری موجود نیست:
ارسال یک نظر
وتی کلوا چێرا نبیس إت