نیکشھرءِ گچین بیتگیں شوراءِ سروکا سرکار منّگا نہ اِنت

ایرانءِ نندارینگیں پرگنگی واکدار ساڑی نہ اَنت کہ نیکشھرءِ گچین بیتگیں شوراءِ سروکا بہ منّ اَنت، بلہ شوراءِ پنچیں باسک گش اَنت کہ سرکارا آئی منّگی اِنت۔

اے ردا شوراءِ باسک مراد رئیسیءَ گوں ایرانی حالرسانا گشتگ کہ آئی شہ بلوچستانءِ گورنرا دستبندی کنت کہ شوراءِ گچین بیتگیں سروک پیربکش دانشءَ بہ منّیت۔ پرچاکہ دگہ کسےءَ گچین کنگءِ ھچ راہ نیست اِنت۔

مراد رئیسیءَ گشتگ کہ پیربکش دانش دو ماہ ساریا گچین بیتگ و آئیءِ نام پہ گورنرا راہ دیگ بیتگ۔ دو ماھاں رند گورنرءِ کارگسا گشتگ کہ آواں گچین بیتگیں شوراءِ سروک قبول نہ اِنت۔ البت، شوراءِ پنچیں باسکانی لوٹ اِنت کہ آوانی گچین کتگیں سروک منّگ بہ بیت۔

واجہ رئیسیءَ گیش کتگ کہ 18 ھزار مردمی شھرا چنچوک وھد اِنت کہ یک شھردارے نیست اِنت۔ ایشیءِ سببا آسراتیانی سرا بدیں کارپدے ودی بیت کنت۔

شوراءِ یک دگہ باسکےءَ گشت کہ گچین بیتگیں سروک یک وانندویں مردمے اِنت کہ جھاد سازندگیءَ 14 سال کار ئی کتگ۔ اے وڑیں مردمے چونکا ذمواریءِ لایق بیت نہ کنت؟

درّک بلوچءَ گیش کت: شھردارءِ منّگا دیر بیگءِ سببا بازیں کارندواں پگار نہ رستگ و دیمرویءِ کار مھتل اَنت۔

ھمے باروا گورنرءِ کارگسا گشتگ کہ نیکشھرءِ شوراءِ فیصلہ منّگ نہ بیتگ و اے باروا شوراءِ سرا کاگدے دیم دیگ بیتگ۔ کاگدا شہ آواں لوٹ کنگ بیتگ کہ ھمنچو زیت بیت بہ کنت، پہ وت دگہ سروکے گچین بہ کن اَنت۔ ارنا