بالگترءَ کُشگ بیتگیں بلوچانی سرا بی ان ام، بی اس او ۔آزاد و بی ال افءِ ترجمانیں اردو روچتاک ‘توار‘ءِ الزام

توارءِ ویبسایٹا مرچی شنگ بیتگیں رپورٹ

پاکستانی فوجءِ دستا بالگترءَ کشتگ بیتگیں 6 بلوچانی سرا بی ان ام، بی اس او ۔آزاد و بی ال افءِ ترجمانیں اردو روچتاک ‘توار‘ءَ الزام جتگ کہ ایشانی گورا نشوی درمان بیتگ۔ پاکستانءِ دگہ ھچ حالجاھا چشیں گپے شنگ نہ بیتگ، نے کہ فوجءِ وتی ترجمانا وتی پریس کانفرنسءِ نیاما چشیں گپے ظاھر کتگ۔

روچتاک توارءِ ردا فورسزءِ کافلہءِ سرا چیریں مردماں بیڑ برتگ و فورسزءَ (فوجیاں) جوابی تیرگواری کتگ و شش بیڑ آروک کشتگ اَنت۔ شہ کشگ بیتگیناں نشوی درمان و سلاح فوجا دستگپتگ اَنت۔ البت، سرجمیں حالجاھانی تھا شوھازگا رند بلوچی نیوز ٹیما ھچ جاگہ نشوی درمانءِ درکپگءِ کسانیں گپے ھم نہ دیست۔

بی ان ال اف نامیں گلےءَ وتی بیانےءَ گشتگ کہ کشگ بیتگیں مردم آوانی گلءِ باسک بیتگ اَنت۔ بی ان ال افءِ کماندار ماسٹر ستار بلوچءَ ھمے ھنیگاں وتا شہ بی ال اف سست و نوکیں ناما گلے جوڑ ئی کت۔ ماسٹر ستار بلوچءَ بی ال افءِ لھتے کار ناروا گشت اَنت و ھمیش اختلافءِ بنی سبب ظاھر کت اَنت۔