زابل ۔ زاھدان راھا نشوی درمانءِ سوداگرے بیگءِ میارا یکے کشگ بوت

حالجاہ فارس نیوزءِ ردا ایرانی واکاں زابل ۔ زاھدان راھا یک گاڑیےءِ سرا تیرگواری کتگ و احمد ۔ق نامیں ڈرایور کشتگ۔ پدا گاڑی اش پٹاستگ کہ شہ ایشیا 6.1 کیلو کراک و 10.5 کیلو ھیروین اش درگپتگ۔

حالا سرکچ داتگ کہ پولیسا پیشوکی حال رستگ کہ شہ زابل نشوی درمان دیم پہ زاھدان برگ بیگا بیتگ اَنت۔ اے ردا پولیسا راہ بستگ و یک گاڑیے پہ اوشتگا دست اش داتگ، بلہ اوشتگءِ بدلا گاڑی تتکگ۔ پولیس آییءِ رندا کپتگ و تیر ئی جتگ۔ تیرانی لگگا ڈرایور مرتگ و گاڑی پچلیٹتگ۔ پولیسا گاڑی پٹاستگ و نشوی درمان درگپتگ اَنت۔