مشرقی بلوچستانءَ دستگیریں ایرانی پولیسانی خلافا کیس ثبت کنگ بوت

مشرقی بلوچستانءَ پترگ و اودا یک بلوچےءَ کشگءِ میارا دستگیریں ایرانی پولیسانی سرا کیس ثبت کنگ بوت۔ ایش یکشنبہءِ شپا شہ سیمسرا گوستگ اَنت و مشرقی بلوچستانءِ خاکءَ سعید ریگی نامیں مردمے کشتگ اش۔ کشگ بیتگیں سعیدءِ پت عبدالغنی ریگیءَ ایشانی خلافا کیس ثبت کنایینتگ۔

سئیں ایرانی پولیسانی نام حجت محمدی، مسلم لطفی و حسین رمضانی شنگ بیتگ اَنت۔ شہ کیسءِ ثبت بیگا ساری پہ ایشانی یلہ کنایینگا ایرانی واکداراں گوں ڈپٹی کمشنر سعید جمالیءَ دیوان کتگ، بلہ دویناں پہ جیڑہءِ ٹھینگا راھے درگپت نہ کتگ۔

ایشانی جوابا ایرانی زری واک مشرقی بلوچستانءِ آپءَ پترتگ اَنت و شہ اودا 16 بلوچ ماھیگر اش دستگیر کتگ و گوں کشتیاں ھمراہ برتگ انتِش۔ پہ ایشانی یلہ کناینگا انگت پاکستانءَ گامگیج بیگءِ ارادہ کتگ۔ بی بی سی

چدا ساری، گوستگیں ماھا، ایرانی واکاں لھتے بلوچ دستگیر کتگ اتنت۔ آواں دستگیر کنگءِ درگتا سئے بلوچ ماھیگر کشگ بیتگ اتنت۔ البت، پاکستانی واکاں اے ردا ظاھرا ھچ گام چست نہ کتگ ات۔