مغربی بلوچستانا 4 اماراتی مردۏم دستگیر بوت اَنت

چار اماراتی مردۏم کہ گوں وتی شکاری شاھین مرغاں زاھدانا سر بیتگ اَنت، ایرانی واکاں دستگیر کۏتگ اَنت۔ ایشانی واھگ بیتگ کہ وتی شاھینانی کۏمکا مغربی بلوچستانا بالی مۏرغ شکار بہ کن اَنت۔ دستگیریں مردۏم چاگرد پھازوکیں واکانی دستا دیگ بیتگ اَنت داں آوانی میارباریاں ثبت ۏ قاضیانی باھوٹ اش بہ کن اَنت۔ ارنا

سیمسرا ایرانیانی دستا یک سلاحبندیں مردے کوشگ ۏ دۏ دستگیر بیتگ أنت

دوشنبہ ې شپا گوں سلاحبندیں مردۏماں جنگے ې سببا یک مردے سیمسرا کۏشگ بیتگ. ارنا ې ردا ھمے ٹولی ې دگہ دۏ کس ایرانی واکانی تیراں ٹپی کۏتگ اَنت۔ پولیسا آوانی باروا حال داتگ کہ شہ پاکستانا سیمسرا گوزَگ ې جۏھدا بیتگ اَنت کہ واکداراں تیرانی دپا داتگ اَنت۔

کنرکا 19 درمۏلکی شپۏک گوں مالاں دستگیر بیتگ أنت

پیام بلوچ سایٹا داتگ کہ ایرانی واکاں مغربی بلوچستان ې تیابدپی شھر کنرکا 19 درمۏلکی مردۏم دستگیر کۏتگ اَنت۔ ایشاں درمۏلکی مال چیرکایی آرتگ ۏ دلمانگ بیتگ اَنت چه إدا دگہ شھراں بہ بر اَنتش۔ ایشانی مال ضبط کنگ بیتگ اَنت ۏ مردۏم قاضیانی دستا دیگ بیتگ اَنت۔ قاضیاں ایش نزیک ھفت میلیون تومن ملام کۏتگ اَنت۔ حالا نہ داتگ کہ مردۏم کۏجام مۏلک ې گنت ۏ باریں ایش وتی مۏلکاں راہ دیگ بیتگ اَنت یا نه!

چمالنگا فوج ۏ سلاحبندیں مردۏمانی نیاما جنگےئا 13 کس کۏشگ بیتگ اَنت

ایٹالیایی حالرسانےې ردا اېنشپی مشرقی بلوچستان ې چمالنگ ھندا پاکستانی فوج ۏ سلاحبندیں مردۏمانی نیاما جنگےئا 13 کس کۏشگ بیتگ اَنت۔ جنگ انگت برجاہ اِنت۔ کۏشگ بیتگیں مردمانی باروا سرپدی دیگ نہ بیتگ کہ باریں فوجی اَنت یا سلاحبندین بیڑ بروک اَنت۔
بی بی سی اردو ئا داتگ کہ فوج پہ وت یک بۏنجلے جوڑ کنگا دستگٹ بیتگ کہ سلاحبندیں مردۏماں بیڑ بۏرتگ۔ بیڑ بروکیں مردۏمانی باروا هم سرپدی یے نہ رستگ. دمگا بلوچستان لبریشن آرمی ۏ فوج ې نیاما براں برانا جنگ بیتگ اَنت۔ بے ھندی مردۏمانی رضایا پاکستان چہ دمگ کھناں اشکر کشگ ۏ برگا اِنت۔

برتانیا ې پیسری وزیر اعظم ٹونی بلېر ې جن ریکو ڈک جیڑوا بلوچستان ې وکالتا کنت

مشرقی بلوچستان ې سرکارا ریکو ڈک جیڑہ ې ردا نامداریں میانملکی وکیل پہ وکالتا کریهـ کۏتگ اَنت۔ ایشانی نیاما برتانیاې پیسری وزیر اعظم ٹونی بلیر ې جن شری بلېر ھم ھوار اِنت۔ تـٹایان کمپنیا نومبر 2011 بلوچستان ې خلافا میانمۏلکی تجارتی جیڑواں ٹھینوکیں بۏجنلا شکایت بۏرتگ کہ بلوچستان ې سرکارا گوں آېیا بستگیں قرادبند پادلپاش کۏتگ ۏ ماں ریکو ڈک طلاہ ۏ دگہ گرانبھاییں معدن ې کشگا کمپنیا نہ الّگا اِنت۔

بلوچےئا کوشگ ې میارا بندیگیں سئے ایرانی پولیس یلہ دیگ بوت اَنت

سئے ایرانی پولیس کہ سراوان سیمسرا مشرقی پاکستان ې خاکا پۏترتگ اتنت ۏ یک بلوچے کۏشتگ اتش، اسلامی قصاص قانون ې ردا خاران ې قاضیےئا یلہ دات اَنت۔ قصاص قانون ې ردا کۏشگ بیتگیں بلوچ ې خون بھا دیگا ۏ خونیاں پھِل کنگا رند آ شہ سرجمیں میارباریاں آزاد بی اَنت۔ قاضی ې دیما خونیاں آرگ ې وھدا کۏشگ بیتگیں سعید ریگی ې مات ۏ پت دادگاھا موجود اَتنت ۏ آواں شه ثبت کۏتگیں کیسا دستاں کشگ ې کاگدے قاضیا دات ۏ سئیں قاتل یلہ دیگ بوت اَنت۔ خون بھایا داتگیں زر ې حساب پاشک کنگ نہ بوت۔ ٹریبیون

جۏمعه 13ې ندارگے



مرچی پاکستانی سیاستکارانی دیوانے نواز شریف ې پاگواجھیا سرجم بیتگ. اے دیوانا چه بلوچستانا آتکگیں محمود اچکزئی ۏ میر حاصل بزنجو ئا ھم بھر زۏرتگ.

ایران ې کوشگ بیتگیں جوھری ساینسدان امریکا مۏردہ باد دانکانی گوڑا کل کنگ بوت

کۏشگ بیتگیں ایرانی ساینسدان مۏصطفا احمدی روشن مرچی ماں تھران ”امریکا مۏردہ باد“ دانکانی گوڑا کل کنگ بوت۔ لھتے مردۏم دانک کوکار کنگا اَتنت ”من کۏشوں ھمایاں کہ منی برات اش کۏشتگ.“ کل کنگ ې میڑیا ھمراھیں مردۏمانی گیشتریں بھر پاسدار ۏ بسیجی اَتنت۔

قلم مئے سلاح ۏ کتاب مئے راھشون

عکس الجزیرہ ې منّتا

خدا حافظ زرۏمبش

ھما سنگتاں کہ منی زرۏمبش ې باسکیا سھیگ بیتگ اَنت، سرپد کنگ لوٹوں کہ من چه زرۏمبش ئا درکپتوں۔ منی درکپگ ې سبب سلاحبندیں جنگانی خلافا زرۏمبش ئا پالیسی یے نہ بیگ اِنت۔

ایران ې یک دگہ جوھری ساینسدانے مرچی کۏشگ بیتگ

ایران ې جوھری ساینسدانے مرچی ماں تھران کۏشگ بیتگ. آېی ې گاڑیا دۏ پرپٹ سواراں راہ رواجی بمبے لچّینتگ ۏ بمب رسگا ترکتگ۔ ایشی ې سببا مۏصطفا احمدی روشن نامیں 32 سالگیں ساینسدان جاہ پہ جاہ کۏشگ بیتگ۔ ایرانا پیسری کوشانی ڈولا ایشی ې میارباری ھم اسراېیلی چاریگانی سرا لڈتگ۔ چدا ساری گوَستگیں سالا ھمے ڈولا یک ساینسدانے کۏشگ بیتگ اَت۔ گارڈین

پہ امریکاءَ چاریگیءِ میارا یک ایرانی نسل امریکاییءَ مرگءِ سزا دیگ بوت

ایرانی دادگاہءِ قاضیےءَ پہ امریکاءَ چاریگی کنگءِ میارا یک ایرانی نسلءِ امریکایی مردمےءَ درنجگءِ حکم داتگ۔ امیر حکمتی نامیں 28 سالگ میاریگ کنگ بیتگ کہ آییا شہ امریکاءَ فوجی و دگہ ھنر ھیل کتگ، پدا عراق و افغانستانءِ تھا ھستیں امریکایی بنجلانی تھا وتی ھیل کتگیں ھنر ئی چکّاستگ اَنت، و رندا پہ امریکاءَ چاریگی کنگءِ مقصدا ایرانءَ پُترتگ۔ ایرانی راڈیوا سزاءِ حالا شنگ کناں فیصلہءِ رمس پاشک نہ کتگ۔ میاریگیں مرد امریکاءَ شہ ایرانی پت و ماتےءَ ودی بیتگ۔ وتی بلّوکءِ چارگا ایرانءَ شتہ بیتگ کہ اودا دستگیر اِش کتگ۔ گارڈین

پاکستانی تحریک طالبانءَ کمک دیگءِ میارا امریکاءَ سئے پاکستانی جیل کرت اَنت

پاکستانی تحریک طالبانءَ کمک دیگءِ میارا مریکایی قاضیےءَ سئے پاکستانی جیل کرتگ اَنت۔ ایشانی نیاما 37 سالگیں عرفان الحقءَ 50 ماہ، 32 سالگیں قاسم علیءَ 40 ماہ و زاھد یوسف نامیں 43 سالگا 36 ماہ بندگ کنگءِ سزا دیگ بیتگ۔

گوستگیں 30 روچاں بانانی تھا کاربن گیسءِ سببا ماں کویٹہ 17 مردم مرتگ اَنت

پاکستانی حالتاک جنگءِ ردا گوستگیں 30 روچاں ماں کویٹہ بانانی تھا کاربن گیسءِ کشتگیں مردمانی حساب 17 کساں سر بوت۔ ایشانی نیاما 5 کس دوشی مرتگ اَنت۔

ایرانی بلوچ ماھیگر کہ امریکاییاں شہ دریایی دۏزاں رکّینتگ اَنت

مغربی بلوچستان ې بلوچ ماھیگر کہ 45 روچ ساریا زری دۏزاں آوار جتہ بیتگ اَنت ۏ ایرانی واکاں پہ وت نہ زۏرتہ بیتگ اَنت، امریکاېی فوجیاں رکّینتگ اَنت۔ رکّینگ بیگا پد یک بلوچ ماھیگرے گوں امریکاېی فوجیےئا دل پہ دل بیگا اِنت ۏ آېی ې منّتاں گرگا اِنت۔

امریکایی واکاں دریایی دوزانی آوار جتگیں 13 ایرانی رکّینت اَنت

شہ امریکایی زری گراب ”یو اس اس کیڈ“ءَ چست بیتگیں بالگردےءَ یک کِشتیے دیستگ کہ آییا ایرانءِ بیرق ٹال کتہ بیتگ۔ ھمے درگتا کِشتیا پہ کمکا کلوےءِ راہ داتگ۔ امریکایی واکاں کشتی پٹاستگ و سرپد بیتگ اَنت کہ 13 ایرانی مردم دریایی دوزانی 15 کسی ٹولیےءَ آوار جتگ اَنت۔

پاکستانءِ سند پرگِنگا گیس دیوکیں 18 انچی پایپے مرچی بامگاھا تراکینگ بوت

بلوچ رپبلکن آرمیءِ ویبجاھا داتگ آوانی مردماں مرچی بامگاھا جعفر آبادءِ ھند ملگزارءَ یک 18 انچی گیس پایپے تراکینتگ۔ ایشی پاکستانءِ سند پرگنگا گیس دیگا بیتگ۔ چدا ساری، گوستگیں لھتے روچان، ھمے پایپ دو رندا تراکینگ بیتگ کہ پاکستانی واکاں پدا اڈ کتگ۔

پیسری آمرانی روک کتگیں آسا بلوچستان انگت بن اِنت: نشنل پارٹی

واکاں ماں سراوان 15 دوز دستگیر کرتگ اَنت

سراوان دمگءِ پولیسانی سروکا گشت کہ دمگا شہ سلکاراں پلگار کنگءِ واھگا بیتگیں کارواییءِ بروردا گوستگیں دو ھفتگانی نیاما 15 نامییں دوز دستگیر کنگ بیتگ اَنت و شہ ایشانی گورا دوزتگیں مال پچگرگ بیتگ اَنت۔ ایشانی ھواریا 11 سلاح، 900 سی ڈی، سٹلایٹ عکس کشوکین 25 کالا و 800 پاکٹ سگریٹ ھم گرگ بیتگ۔ ھمے نیاما 20 نشوی درمانءِ سوداگر و نشہ کنوکیں مردم گرگ بیتگ اَنت، و شہ ایشانی گورا 60 کیلو نشوی درمان درکپْتگ۔ ارنا

لیاریءِ بلوچانی ایمنیں لشکرءِ سرا پولیسا تیرگواری کرت

بلوچی نیوزءِ ھندی نمانیدہءِ ردا کراچیءِ بلوچانی لشکرے کہ پہ میڑی کنگا دیم پہ بلاول ھاؤسءَ راھی ات، پاکستانی پولیسا داشْت و لشکرءِ مردمانی سرا ارس ریچی گیس دور دات، و تیرگواری کت۔ بلوچ لشکرا ھواریں مردم ھنی شھرءِ دمْکاں شِنگ شانگ اَنت و پولیس آوانی رندا کپتگ۔ بلوچانی سرا پولیسءِ زوراکیانی خلافا لیاری امن کمیٹیءِ سرکشّیا اے لشکر رھیج گپتہ بیتگ۔ تیرگواریءِ سببا کسے ٹپّی یا کُشگ بیگءِ حالے انگت نیست۔ البت، ترس ھمیش اِنت کہ بازیں کس تیرانی آماچ بہ بی اَنت و پولیس بازیں کساں دستگیر بہ کنت۔